Hezbollahu i Libanit; 38 vjet pas themelimit të tij

Kanë kaluar 38 vjet nga themelimi i Hezbollahut në Liban. Lëvizja e Hizbollahut është fuqizuar në mënyrë të tillë që sot konsiderohet si një nga lojtarët më me ndikim dhe më të rëndësishëm në skenën e sigurisë dhe politike të rajonit të Azisë Perëndimore.

Hezbollahu i Libanit mund të quhet aktori më i rëndësishëm joshtetëror në Boshtin e Rezistencës, një aktor që u bë model për grupet e tjera anëtare të Boshtit të Rezistencës. Hezbollahu i Libanit u formua në vitin 1982, tre vjet pas fitores së Revolucionit Islamik iranian. Hezbollahu u formua me mbështetjen e Republikës Islamike të Iranit. Ekziston një lidhje e drejtpërdrejtë midis liderëve të Hezbollahut në Liban dhe liderëve të Revolucionit Islamik të Iranit. Rrënjët e rezistencës në Liban fillojnë me veprimet e Imam Musa Sadrit, veçanërisht në formimin e Lëvizjes së Rezistencës Libaneze Amal. Një grup në lëvizjen Amal i cili kishte një orientim më të fortë fetar dhe këmbënguli për të luftuar kundër regjimit sionist, së bashku me grupet e tjera në Liban që ishin nën ndikimin e Revolucionit Islamik të udhëhequr nga Imam Khomeini (r.a), themeloi Hezbollahun në vitin 1982 me mbështetjen e Republikës Islamike të Iranit. Kongresi i parë kombëtar i Hezbollahut u mbajt në Teheran në vitin 1989 dhe Shejh Sobhi Tafili u zgjodh sekretar i përgjithshëm. Por për shkak të dallimeve të shumta, dy vjet më vonë, në vitin 1991, Sejed Abas Musavi u zgjodh sekretar i ri i përgjithshëm i kësaj partie. Sejed Abas Musavi u vra nga regjimi sionist më pak se një vit më vonë dhe Këshilli i Hezbullahut emëroi Sejed Hasan Nasrallah si sekretar të përgjithshëm të partisë.  Sejed Hasan Nasrallah ka qenë Sekretar i Përgjithshëm i Hezbollahut të Libanit që nga viti 1992.

Hezbollahu u themelua në situatën kur regjimi sionist sulmoi Libanin, pushtoi shumë pjesë të këtij vendi dhe rrethoi edhe Bejrutin. Më 6 qershor 1982, ushtria sioniste nisi një pushtim masiv të Libanit nga toka, ajri dhe deti, dhe shpejt përparoi në portat e Bejrutit pa rezistencë të konsiderueshme nga Libani dhe rrethoi kryeqytetin e dytë të një vendi arab. Jerusalemi është kryeqyteti i parë arab që u pushtua nga Izraeli në vitin 1967. Në fakt, pushtimi i Libanit nga regjimi sionist përfaqësoi disfatën e nacionalizmit arab dhe krijoi terrenin për formimin e Hezbollahut. Në formimin e Hezbollahut të Libanit, lufta kundër regjimit pushtues sionist luajti një rol të madh. Hezbollahu në thelb ka një problem esencial me regjimin sionist dhe përballjen me këtë regjim e konsideron jo vetëm detyrë kombëtare, por edhe detyrë të tij fetare dhe beson se duke qenë se natyra e regjimit sionist bazohet në agresion, kompromisi me këtë regjim nuk mund të pranohet kurrë. Masud Asadollahi, ekspert për çështjet e Azisë Perëndimore, thotë: “Arsyeja kryesore për formimin e Hezbollahut ishte agresioni i regjimit sionist kundër Libanit. Në njëfarë kuptimi, Hezbollahu është lindja e rezistencës kundër pushtimit izraelit". Përveç kësaj, Hezbollahu i Libanit kundërshton çdo ndërhyrje të SHBA-së në çështjet e rajonit të Azisë Perëndimore dhe e konsideron Amerikën si shkaktarin kryesor të krizave në rajonin e Azisë Perëndimore dhe konkretisht në Liban.  Për këtë arsye, Hezbollahu po përballet edhe me politikat armiqësore të Uashingtonit.

Hezbollahu ka bërë arritje të guximshme dhe strategjike në Liban. Në fillim, kjo parti u përball me Izraelin me operacione martirizuese dhe më pas me raketa Katyusha dhe luftëra guerile. Pas operacioneve të ndryshme, Hezbollahu ishte në gjendje ta detyronte Izraelin të tërhiqej nga Libani jugor në vitin 2000. Kjo arritje shumë e rëndësishme, përveçse ruajti sovranitetin dhe integritetin territorial të Libanit, zhvlerësoi edhe mitin e pathyeshmërisë së ushtrisë së regjimit pushtues sionist. Në vitin 2006 u zhvillua një luftë 33-ditore midis Hezbollahut dhe regjimit pushtues sionist, e cila ishte një pikë kthese për zhvillimet në Azinë Perëndimore. Qëllimi i kësaj lufte ishte shkatërrimi i Hezbollahut të Libanit, por kjo luftë përfundoi pas 33 ditësh me disfatën e ushtrisë sioniste. Një nga pasojat më të rëndësishme të luftës së vitit 2006 ishte se që nga ky vit, regjimi sionist nuk ka guxuar t'i imponojë asnjë luftë Libanit. Ndërsa Hezbollahu u formua në të njëjtën kohë me pushtimin e pjesëve të Libanit nga regjimi sionist, sot integriteti territorial i Libanit nuk kërcënohet nga regjimi sionist dhe në të njëjtën kohë, Hezbollahu përballet me rreziqet në mjedisin përreth që kërcënojnë sigurinë dhe integritetin territorial të Libanit. Prania e Hezbollahut të Libanit në Siri që nga viti 2011 dhe pjesëmarrja e tij në luftën kundër terroristëve brenda Sirisë është një shembull i përballjes së Hezbollahut me kërcënimet jetike kundër Libanit, dhe në të njëjtën kohë, tregon se ndikimi dhe roli i Hezbollahut ka shkuar përtej Libanit.

Hezbollahu është një nga lojtarët në rajonin e Azisë Perëndimore që kundërshton kompromisin me regjimin pushtues sionist, kundërshton ndërhyrjen amerikane në çështjet rajonale dhe thekson pavarësinë e Libanit nga çdo ndërhyrje e huaj. Ndërsa disa vende arabe i nënshtrohen politikave të Arabisë Saudite, Hezbollahu kundërshton çdo nënshtrim ndaj politikave të Riadit. Gjithashtu, Hezbollahu i Libanit është një aleat i ngushtë i Republikës Islamike të Iranit. Për këtë arsye, boshti arab i udhëhequr nga Arabia Saudite, së bashku me regjimin sionist dhe Shtetet e Bashkuara, janë kundërshtarë seriozë të Hezbollahut të Libanit dhe e kanë përfshirë Hezbollahun në listën e tyre të sanksioneve dhe të terrorizmit. Megjithatë, Hezbollahu ka vazhduar rrugën e rezistencës kundër këtyre armiqësive dhe kjo strategji ka bërë që njerëzit të mirëpresin dhe përkrahin Hezbollahun në Liban. Hezbollahu për herë të parë mori pjesë në zgjedhjet libaneze në vitin 1992 dhe fitoi 12 vende në parlament. Në vitin 1996, ai fitoi 10 vende dhe në vitin 2000, 8 nga 128 vende në parlamentin libanez. Në zgjedhjet e përgjithshme të vitit 2005, ai fitoi 14 vende i vetëm dhe në aleancë me lëvizjen Amal fitoi të gjitha 23 vendet në zonat në Libanin e Jugut.  Në zgjedhjet parlamentare të Libanit në vitin 2018, koalicioni i Hezbollahut fitoi 68 vende dhe për herë të parë fitoi shumicën absolute të vendeve në parlamentin libanez. Në zgjedhjet e fundit parlamentare të Libanit që u mbajtën në maj, me gjithë shpenzimet kolosale të bëra nga kundërshtarët e Hezbollahut, koalicioni i rezistencës arriti të fitojë 62 vende në parlament dhe të mbetet ende si koalicioni politik më me ndikim dhe më i rëndësishëm në skenën politike libaneze. Kjo situatë, më shumë se çdo gjë tjetër, tregon se Hezbollahu gjatë 38 viteve të fundit ka përmirësuar gradualisht pozicionin e tij në shoqërinë libaneze dhe sot ai luan një rol të spikatur si në skenat politike, ashtu edhe në ato të sigurisë të Libanit.