لشکر کشی تاجیکستان و طالبان در برابر هم

در پی تشدید تنش میان طالبان و تاجیکستان، بنا به اعلام منابع روسیه ، نیروهای نظامی دو طرف در برابر هم صف آرایی کرده اند.

دولت روسیه با ابراز نگرانی از پیامدهای تنش فزاینده میان تاجیکستان و طالبان، دو طرف را به رفتار مسئولانه دعوت کرده است .

تاجیکستان از مرزهای مشترک خود با افغانستان به طول 1350 کیلومتر بخصوص در زمان حاکمیت  طالبان هیچگاه احساس امنیت نکرده است. در دو دهه پیش نیز که طالبان بر افغانستان به غیر از دره پنجشیر حاکمیت داشت از روابط تنش زایی با تاجیکستان برخورداربود و این کشور با حمایت از گروه ائتلاف شمال به رهبری احمد شاه مسعود قهرمان فقید  ملی افغانستان رودرروی طالبان قرار داشت.

اکنون نیز دولت تاجیکستان همچون گذشته با ابراز نگرانی از نفوذ گروههای افراطگرا و تروریستی به داخل خاک این کشور از طریق افغانستان، خواهان تقویت صلح و ثبات در این کشور از طریق تشکیل دولت فراگیر از سوی گروه طالبان است. 

فریدون بارکزی Barakzai  کارشناس افغان مسایل سیاسی معتقد است : طالبان باید از گذشته درس بگیرد و سیاستهایی که منجر به نابودی آن شد کنار بگذارد و در جهت جلب همکاری های منطقه ای و بین المللی تلاش کند. 

این در حالی است که گروه طالبان با متهم کردن تاجیکستان به مداخله در امور داخلی افغانستان دولت دوشنبه را تهدید می کند.این تلقی که که ممکن است تاجیکستان با حمایت از گروههای پنجشیری باردیگر آنها را مانند دو دهه گذشته در برابر طالبان قرار دهد این گروه را نگران می کند .

به همین دلیل طالبان مهمترین و نزدیک ترین تهدید در مورد موجودیت خود در افغانستان را تاجیکستان تلقی می کند و درصدد است برخورد محکمی با دولت دوشنبه داشته و لطمات گذشته از تاجیکستان را تلافی کند.با این حال، نباید نگرانیهای دولت دوشنبه  از فعالتر شدن گروههای مخالف تاجیک  در افغانستان را نیز نادیده گرفت.

در این زمینه فرنگیس نجیب الله کارشناس افغان مسایل سیاسی براین باور است ، دولت تاجیکستان نگران تقویت گروههای مخالف خود از جمله جماعت انصار.ا... است که توافقنامه سال 1997 میان دولت دوشنبه و اسلامگرایان مخالف دوشنبه را نپذیرفت و اکنون یک گروه بالقوه خطرناک برای دولت دوشنبه تلقی می شود.

علاوه براین، به نظر می رسد دولت تاجیکستان نگران تعدادی از تاجیک هایی است که در جریان جنگ های داخلی این کشور به افغانستان گریختند.

در هر حال ، به نظر می رسد دولت روسیه برنده تشدید تنش میان طالبان و دولت تاجیکستان باشد. زیرا مسکو به عنوان برادر بزرگتر می کوشد با تقویت همکاری های امنیتی بیش از پیش حلقه امنیتی خود را در منطقه بویژه میان جمهوری های اتحاد شوروی تنگتر کند.

بیشتر بخوانید:

• طالبان توان حمله به تاجیکستان را ندارد

• طالبان خبر داد: استقرار هزاران نیرو در مرز با تاجیکستان