Таъкиди Могерини бар ҳимояти Аврупо аз барномаҳои тавсеаи пойдори Осиёи Марказӣ
Федерико Могерини, дипломати аршади Иттиҳоди Аврупо дар умури сиёсати хориҷӣ ва амниятӣ аз барномаи ин иттиҳодия барои ҳимоят аз муҳити зист, иқдомоти иқлимӣ, тавлид ва масрафи пойдори энержӣ, баробарии ҷинсиятӣ, мубориза бо терроризм ва омӯзиш дар Осиёи Марказӣ хабар дод.
Ба гузориши ИРНА, Федерико Могерини дар дидор бо вазирони умури хориҷаи кишварҳои Осиёи Марказӣ гуфт, ки роҳбурди ҷадиди Иттиҳоди Аврупо моро қодир месозад то ба ҳамроҳи кишварҳои Осиёи Марказӣ бо чолишҳои пешорӯ дар заминаи тавсеаи пойдор ва танаввӯи иқтисодӣ, тақвияти ҷомеаи маданӣ ва ҳуқуқи башар мувоҷеҳ шавем ва бо кумакҳои тахассусӣ ва пуштибонии молӣ онҳоро ҳаллу фасл кунем.
Могерини афзуд, пӯёии мусбати минтақаӣ дар Осиёи Марказӣ ва тақозои ҳамкории бештар бо Иттиҳоди Аврупо фурсати муҳиме барои ҳамкории наздиктар ва қавитар ба шумор меравад.
Дар ин нишаст, ки дар Бишкек, пойтахти Қирғизистон баргузор шуда буд, вазирони умури хориҷаи Тоҷикистон, Туркманистон, Қазоқистон, Қирғизистон ва Узбакистон бори дигар бар тааҳҳудоти муштараки худ барои ҳамкории қудратманд, мутанаввеъ ва пешрав, ки бар пояи пӯёии мусбат ва манофеи мутақобили қавӣ байни ду минтақа аст, таъкид карданд.
Онҳо ҳамчунин тааҳҳуди худро барои ҳамкорӣ дар дастёбӣ ба сулҳ, амният, ҳуқуқи башар, демократия ва тавсеаи пойдор бо эҳтироми комил ба қонунҳои байналмилалӣ эълом карданд.
Ширкаткунандагон ҳамчунин бар аҳамияти ҳимоят аз ҳузури Афғонистон дар тарҳҳои ҳамкории Осиёи Марказӣ ва тақвияти иртибот байни ин кишварҳо ва Афғонистон таъкид кардаанд.
Могерини пеш аз сафар ба Осиёи Марказӣ гуфта буд, музокиракунандагони мо дар тамоми панҷ кишвар ва ҳатто дар тамоми дунё хуб медонанд, ки кумакҳои мо шарти хосе дорад ва шарташ низ озодии баён ва фаъолияти созмонҳои ғайриҳукуматӣ аст. Ҳоло аз мақомоти кишварҳои Осиёи Марказӣ мехоҳем то тазмини бидиҳанд, ки ақоид дар ин кишварҳо озодона баён шавад ва матбуот нақши озодонае дошта бошад. Ин мавзуъ барои ҳама муфид аст, зеро собиқаи риояти ҳуқуқи башар дар ҳар кишваре барои ҷалби сармоя ва сармоягузор дар арсаҳои байналмилалӣ муҳим аст.
