Раиси созмони Самандар: Беҳтар буд, Тоҷикистон дар қазияи парвозҳо кӯтоҳ меомад
Раиси Созмони коргарони муҳоҷири тоҷикистонӣ дар Русия мавсӯм ба Самандар таъкид кардааст, ки ба далели вобастагии беш аз андозаи иқтисодӣ ва амниятии Тоҷикистон ба Русия беҳтар буд, ки душанбе дар моҷарои парвозҳо бо Маскав каме кӯтоҳ меомад.
Ба иттилои сайти Русия барои ҳама, Абдуллоҳ Давлатов гуфтааст, ки амнияти Тоҷикистонро пойгоҳи низомии 201 артиши Русия таъмин мекунад ва иқтисоди кишвар низ мадюни даромади ирсолии коргарони муҳоҷири тоҷик аз Русия аст.
Ба гуфтаи Давлатов, ширкатҳои ҳавоии Русия барои интиқоли шаҳрвандони Тоҷикистон қиммати билетро ба маротиб арзонтар аз ширкатҳои ҳавоии Тоҷикистон муқаррар кардаанд, ки ба нафъи шаҳрвандони ин кишвар аст ва онон ба далели сарфаҷуии молӣ тарҷеҳ медиҳанд, ки аз хадамоти ширкатҳои ҳавоии Русия истифода кунанд.
Вай муътақид аст, моҷарои ахир бар сари парвози ҳавопаймоҳои мусофирӣ миёни Тоҷикистон ва Русия, ки аз рӯзи 22 декабри гузашта оғоз ва муҷиби мамнуияти парвози бархе ширкатҳои ду кишвар ва саргардонии мусофирон шудааст, реша дар манофеи иқтисодӣ дорад.
Ба далели боло гирифтани ихтилофи Русия ва Тоҷикистон бар сари парвози ҳавопаймоҳо миёни Душанбе ва Маскав акнун ширкатҳои ҳавоии ду кишвар тасмим гирифтаанд, ки алайҳи якдигар ба додгоҳҳо шикоят кунанд.
