Ифтитоҳи парки бозсозишудаи “Куруши кабир” дар шаҳри Душанбе
Июн 08, 2019 21:38 Asia/Dushanbe
Раисҷумҳури Тоҷикистон ва шаҳрдори Душанбе рӯзи шанбе дар маросиме бӯстони бозсозишудаи “Куруши кабир”-ро дар ноҳияи Шоҳмансури пойтахт ифтитоҳ карданд.
Ба гузориши хабаргузории давлатии “Ховар”, ин бӯстон дар масоҳати панҷ гектар воқеъ шудааст ва кори бозсозии он беш аз як сол идома дошт.
Бӯстони “Куруши кабир” дорои чаҳор вурудии бузург ва 22 вурудии хурд аст.
Дар ин бӯстон, ки бо ҳузури Эмомалӣ Раҳмон ва Рустами Эмомалӣ ифтитоҳ шуд, барои дӯстдорони варзиш низ се замини футбол, волейбол ва теннис сохта шудааст.
Ҳамчунин дар гӯшаву канори бӯстон тандиси ҳунармандони саршиноси тоҷик насб шудааст.
Ин бӯстон имкони иштиғоли доимро барои 40 нафар аз сокинони шаҳри Душанбе фароҳам кардааст.
