Музокироти Тоҷикистон барои таъхири бозпардохти қарзи хориҷӣ

Бонки Ҷаҳонӣ эълом кард, ки Ҳукумати Тоҷикистон бо ниҳодҳои молии байналмилалӣ, минтақаӣ ва кишварҳои қарздиҳанда барои ба таъхир афтодани муддати бозпардохти қарзи хориҷии хеш вориди музокира шудааст.

Ба гузориши сомонаи Авесто, Бонки Ҷаҳонӣ дар гузориши тозае бо унвони “кунд шудани рушди иқтисодии Тоҷикистон дар шароити корона” эълом кардааст: «гуфт‌угӯҳои ҳукумати Тоҷикистон бо қарздиҳандагони хориҷӣ барои таъхири муваққати замони бозпардохти қарзи ин кишвар оғоз шудааст.»

Гуфта мешавад, ки Чин бо ин дархости Тоҷикистон мувофиқат кардааст.

Аз сӯи дигар бар асоси гузориши вазорати молияи Тоҷикистон қарзи хориҷии кишвар дар 10 моҳи соли ҷорӣ ба 3 миллиарду 163 миллиону 200 ҳазор доллар расидааст, ки бар ҳар як аз ҷамъияти 9 миллиону 400 ҳазорнафарии Тоҷикистон 335 доллари рост меояд.

Пештар эълом шуда буд дар шаш моҳи нахусти 2020 саҳми ҳар шаҳрванди Тоҷикистон аз қарзи хориҷӣ ба ҳудуди 330 доллар расидааст.

• 330 доллар: саҳми ҳар шаҳрванди Тоҷикистон аз қарзи хориҷӣ

Дар ҳоли ҳозир қарзи Тоҷикистон ба Бонки содирот ва воридоти Чин як миллиарду 133 миллион доллар, Бонки Ҷаҳонӣ 338 миллион доллар, Бонки Рушди Осиё 287 миллион доллар ва Бонки тавсеъаи исломӣ 132 миллион доллар эълом шудааст.

Ҳамчунин Тоҷикистон ба сандӯқҳои рушди теъдоде аз кишварҳои арабӣ низ қарздор аст.

БЕШТАР БИХОНЕД:

• Қарзи хориҷии Тоҷикистон ду баробари тавлидоти саноатии ин кишвар
• Таъхир дар бозпардохти қарзҳои Тоҷикистон ба Чин
• Ҳушдори Сандуқи рушду суботи АвруОсиё дар бораи афзоиши қарзи хориҷии Тоҷикистон