Барчидани антеннаҳои моҳвора дар хиёбони Рӯдакии Душанбе оғоз шуд
-
Шаҳрдории Душанбе мегӯяд, мавҷгирҳои моҳвораӣ рӯи бомҳо намои шаҳрро халал дор кардааст
Коргарони хадамоти шаҳрии Душанбе барномаи барчидани мавҷгирҳои моҳвораӣ аз рӯи боми хонаҳо дар хиёбони Рӯдакӣ дар маркази шаҳрро оғоз кардаанд.
Ба гузориши сомонаи Азия Плюс, қаблан мақомоти ноҳияи Исмоили Сомонии шаҳри Душанбе ба сокинони ин хонаҳо ҳушдор дода буданд, ки то рӯзи 16 май тамомии антеннаҳои моҳвораиро ҷамъ кунанд ва дар акси ҳол кормандони идороти хадамоти шаҳрӣ ин корро анҷом хоҳанд дод.
Далели ин иқдом халалдор шудани намои берунии хонаҳои баландошиёна унвон шуда ва гуфта мешавад, ки коргарон ҳангоми соту сози боми ин хонаҳо наметавонанд ба осонӣ фаъолият кунанд.
Сокинони бархе аз ин хонаҳо муддаӣ ҳастанд, ки шаҳрдорӣ ҳақи мудохила дар моли хусӯсии онҳоро надорад.
Аммо Илҳом Обидов, мудири Созмони ҳимоят аз ҳуқуқи масрафкунандагон дар Тоҷикистон мегуяд, ки дар сӯрати ба чунин натиҷа расидани шаҳрдории Душанбе, ки вуҷӯди антеннаҳои моҳвораӣ рӯи боми хонаҳо мӯҷиби халалдор шудани намои берӯнии ин хонаҳо мешавад, дар ин маврид ҳақ бо ҳукумат аст.
Ин дар ҳоле аст, ки дар моҳи феврали имсол дастури барчидани антеннаҳои моҳвораӣ дар хиёбони Ҳофизи Шерозии шаҳри Душанбе бо вокуниши шадиди корбарон дар шабакаҳои иҷтимоӣ рӯ барӯ шуда буд, ки шаҳрдории пойтахти Тоҷикистонро ба мудохила дар зиндагии хусӯсии сокинони Душанбе муттаҳам мекарданд.
Бештар бихонед:
