Чаро Макрон муътақид аст, ки Гуруҳи 20 дар остонаи фурӯпошӣ аст ?
Порс Тудей– Эммануэл Макрон, раиси ҷумҳури Фаронса дар ифтитоҳияи иҷлоси гурӯҳи 20 дар Йоҳаннесбург дар суханони бесобиқа гуфт, ки ин гурӯҳ тавони асаргузории худ бар бӯҳронҳои ҷаҳониро аз даст додааст.
Ба гузориши Порс Тудей, Йоҳаннесбурги Африқои Ҷанубӣ аз рӯзи шанбе ба муддати 2 рӯз мизбони сарони кишварҳои гурӯҳи 20 аст. Гурӯҳи 20 созмони байн-давлатӣ, мушаккал аз 19 кишвар ба ҳамроҳи Иттиҳодияи Аврупо (EU) ва Иттиҳодияи Африқо (AU) аст. Кишварҳои гурӯҳи 20 намояндаи 85 дарсади тавлиди иқтисодии ҷаҳон ва 75 дарсади тиҷорати ҷаҳонӣ буда ва ду севуми ҷамъияти ҷаҳонро дар бар мегиранд, ин гурӯҳ барои расидагӣ ба масоили умдаи муртабит бо иқтисоди ҷаҳонӣ, монанди суботи молии байналмилалӣ, тағйироти иқлимӣ ва тавсиаи пойдор фаъолият мекунад.
Иҷлоси Йоҳаннесбург бо шиори «Ҳамбастагӣ, баробарӣ ва пойдорӣ» баргузор мешавад ва дар бораи чолишҳо ва авлавиятҳои ҷаҳонӣ, дар дараҷаи аввал рушди иқтисодии пойдор, тавсиа ва таъмини молӣ баҳс хоҳад кард. Ҳамчунин ҳамкорӣ ва масири пешорӯ барои гурӯҳи 20 меҳвари гуфтугӯҳои сарони кишварҳо хоҳад буд. Бо ин ҳол, таҳримҳо, даргириҳо, фақр ва гуруснагӣ боиси коҳиши мизони интизорот аз иҷлоси иқтисодҳои қудратманди ҷаҳон дар Йоҳаннесбург шудааст. Амрико ин иҷлосро бойкот карда ва сарони Чин ва Русия ҳам ғоиб ҳастанд. Гурӯҳи 20, ки дар даҳаҳои ахир ба унвони муҳимтарин маҷмаи иқтисодӣ ва сиёсии ҷаҳон шинохта мешуд, имрӯз бо чолишҳои ҷиддӣ рӯбарӯст. Лизо интизор намеравад дар поёни ин иҷлос баёнияи муштараке содир шавад, балки танҳо баёнияе аз сӯи кишвари мизбон мунташир хоҳад шуд.
Макрон дар оғози нишасти сарони гурӯҳи 20 дар Йоҳаннесбург ҳушдор дод, ки ин гурӯҳ дар ҳоли аз даст додани тавоноии худ барои таъсиргузорӣ бар бӯҳронҳои ҷаҳонӣ аст ва ин амр мавҷудияти онро ба хатар меандозад. Ба гуфтаи ӯ, расидани аъзои гурӯҳ ба равишҳои муштарак дар ҳавзаҳои амниятӣ рӯз ба рӯз душвортар шуда, зеро ваҳдати лозим миёни онҳо вуҷуд надорад. Ӯ дар суханронии худ гуфт: «Гурӯҳи 20 эҳтимолан ба поёни сикли худ наздик мешавад. Мо дар лаҳзае аз геополитика қарор дорем, ки ҳалли бӯҳронҳои бузурги байналмилалӣ дар ин миз бисёр душвор шуда; аз ҷумла бо таваҷҷуҳ ба аъзое, ки имрӯз ҳатто дар инҷо ҳузур надоранд. Расидан ба як стандарти муштарак дар ҳавзаи геополитика барои мо душвор аст.»
Яке аз далоили аслии ҳушдори Макрон, ташдиди ихтилофот миёни қудратҳои бузурги узви гурӯҳи 20 аст. Дар шароите, ки бӯҳронҳои ҷаҳонӣ монанди тағйироти иқлимӣ, ҷангҳо, ноамнии ғизоӣ ва бӯҳронҳои молӣ ниёзманди ҳамкории ҷамъӣ ҳастанд, аъзои гурӯҳ ба ҷои ҳамгароӣ, бештар ба самти рақобат ва тақобул ҳаракат кардаанд. Ин вазъият боис шуда, ки тасмимгириҳои муштарак дар ин маҷмаъ ба кундӣ пеш равад ё ҳатто мутаваққиф шавад. Макрон дар суханони худ ишора кард, ки бархе аъзо ҳатто дар нишастҳо ҳузур надоранд ва ин амр нишондиҳандаи коҳиши ҷиддии инсиҷоми дарунии гурӯҳ аст.
Аз сӯи дигар, таҳаввулоти амниятӣ ва низомии ахир монанди ҷанги Украина ва танишҳои миёни Ғарб ва Русия, ҳамчунин рақобати фазоянда миёни Иёлоти Муттаҳида ва Чин, фазои ҳамкорӣ дар гурӯҳи 20-ро ба шиддат тазъиф кардааст. Дар чунин шароите, дастёбӣ ба тавофуқҳои ҷомеъ дар заминаи амнияти ҷаҳонӣ ё иқтисоди байналмилал тақрибан ғайримумкин шудааст. Макрон ин вазъиятро нишонае аз поёни сикли таърихии гурӯҳи 20 донист ва ҳушдор дод, ки агар раванди кунунӣ идома ёбад, ин ниҳод дигар қодир ба ифои нақши муассир дар мудирияти бӯҳронҳои ҷаҳонӣ нахоҳад буд.
Дар воқеъ, суханони Макрон бозтобе аз нигаронии густардатар дар миёни раҳбарони ҷаҳон аст, ки муътақиданд сохторҳои суннатии ҳамкории байналмилалӣ дигар посухгӯи ниёзҳои имрӯз нестанд. Гурӯҳи 20 замоне тавонист дар бӯҳрони молии 2008 нақши муҳимме ифо кунад, аммо акнун дар баробари бӯҳронҳои печидатар ва чандбуъдӣ, короии худро аз даст додааст. Ин ҳушдор нишон медиҳад, ки ҷаҳон ниёзманди бозандешӣ дар созукорҳои ҳамкории байналмилалӣ аст; созукорҳое, ки битавонанд бо воқеиятҳои ҷадиди геополитикӣ ва иқтисодӣ ҳамоҳанг шаванд.
Ба ин тартиб, Макрон бо баёни инки гурӯҳи 20 дар остонаи фурӯпошист, на танҳо заъфҳои кунунии ин ниҳодро барҷаста кард, балки зарурати эҷоди чорчӯбҳои тоза барои мудирияти бӯҳронҳои ҷаҳониро низ ёдовар шуд. Суханони ӯ ҳушдори ҷиддиест, ки агар нодида гирифта шавад, мумкин аст ҷаҳон дар мувоҷеҳа бо бӯҳронҳои оянда бидуни як маҷмаи муассир ва ҳамоҳанг боқӣ бимонад.
Дар айни ҳол, иҷлоси сарони гурӯҳи 20 дар Йоҳаннесбурги Африқои Ҷанубӣ таҳти таъсири танишофаринии бесобиқаи Доналд Трамп, раисҷумҳури ҷанҷолии Амрико, қарор гирифтааст. Иёлоти Муттаҳида, ки қарор аст пас аз Африқои Ҷанубӣ риёсати баъдии гурӯҳи 20-ро бар уҳда бигирад, дар ин иҷлос ҳузур надорад. Доналд Трамп нахустин иҷлоси гурӯҳи 20 дар қитъаи Африқоро ба шакли ошкор бойкот карда ва ҳатто ҳайате низ эъзом накардааст. Ин иқдом дар таърихи ин гурӯҳи ҷаҳонии таъсиргузор то кунун бесобиқа будааст ва зоҳиран нишондиҳандаи равобити пуртаниши Трамп бо Африқо ва ба вижа Африқои Ҷанубӣ аст.
Ин фосилагирӣ муддатҳо пеш оғоз шудааст ва замоне барои ҳамагон ошкор шуд, ки Трамп дар ҷараёни сафари Сирил Рамафоса, раиси ҷумҳури Африқои Ҷанубӣ ба Амрико дар моҳи май аз ончи «наслкушии сиёҳпӯстон алайҳи кишоварзони сафедпӯст» номид, сухан гуфт. Пушти ин мавзеъгирӣ ҳамчунин танишҳое қарор дошт, зеро Африқои Ҷанубӣ ба дунболи наздикии бештар ба Русия ва Чин буда ва ба хотири ҷанги Ғазза дар Додгоҳи Байналмилалии Адолат иттиҳоми наслкушӣ алайҳи Исроил, муттаҳиди Амрико, матраҳ кардааст.
Трамп дар авохири сентябр барномаи 25-солаи « Agua»-ро лағв кард; барномае, ки ба кишварҳои африқоӣ имкони дастрасии бедуни тариф ба бозори Амрикоро медод. Дар натиҷа, кишварҳое чун Лесото, Кения ва Мадагаскар ва ҳамчунин худи Африқои Ҷанубӣ, ки бо нархи болои бекорӣ рӯбарӯст, шуғлҳои бисёреро аз даст медиҳанд.
