Amir Abdollahian: Terrorçylyk sebit ýurtlarynyň umumy duşmanydyr
Eýranyň Daşary işler ministri terrorçylygy sebit ýurtlarynyň umumy duşmany hasaplady.
Düýn agşam (çarşenbe) Owganystanyň Daşary işler ministrliginiň binasynyň öňünde bolan partlamadan soň azyndan 5 adam ölüp, onlarça adam ýaralandy.
Owganystanyň Kabul şäherinde bolup geçen terrorçylykly hüjümiň jogapkärçiligini DAEŞ terror topary öz üstüne aldy.
IRNA habar gullugynyň habaryna görä, Eýranyň Daşary işler ministri Huseýin Amir Abdollahian penşenbe güni Talyban hökümetiniň Daşary işler ministri Amir Han Motagi bilen telefon arkaly söhbetdeşlikde düýn Kabuldaky terrorçylykly hüjümi ýazgarmak bilen terrorçylyk sebit ýurtlarynyň umumy duşmanydyr we olar bigünä adamlary öldürmek bilen eziji ýurtlaryň sebitdäki ýurtlara agalyk etmeklerine şert döretmegiň yzyndadyrlar diýdi.
Eýranyň daşary işler ministri sözüniň dowamynda düýn Kabulda bolup geçen wakalar we birneme öň Şirazdaky (Eýranyň günortasy) Şahçeragyň mukaddes ybadathanasynda bolup geçen wakalaryň ýeke-täk gelip çykyşy bardygyny we oňa garşy göreşmek üçin ýeke-täk syýasat ulanylmalydygyny aýtmak bilen terrorçylar bilen iş salyşmak üçin ähli güýç bilen hyzmatdaşlyk etmelidigini nygtady.
Bu söhbetdeşlikde Talyban hökümetiniň daşary işler ministri Amir Han Motagi Amir Abdollahýanyň telefon jaňyna minnetdarlyk bildirdi we iki ýurduň halkynyň doganlygyny we dostlugyny nygtady we goňşy ýurtlar bilen hyzmatdaşlykda terrorçylyga garşy aýgytly göreşiň zerurdygyny aýtdy.
