Ysraýyl režimiň Gaza garşy hüjümleri dowam edýär
Saglygy gorayş işgärleri ady agzalan hüjümde 10 adamyň şehit bolandygyny we köp sanda adamyň ýaralanandygyny habar berdiler
Ysraýylyň harby uçarlarynyň Gaza zolagynyň günortasyndaky Han Ýunus şäheriniň Mewasi diýilýän ýerinde ýaşaýan ýerlerinden göçürilen adamlaryň galýan çadyr düşelgäniň golaýyna hüjüm guramagy netijesinde 10 palestinaly pida boldy.
Şaýatlaryň habar bermegine görä, Ysraýylyň goşuny Mewasi sebitinde ýaşaýan ýerlerinden göçürilen adamlaryň galýan çadyr düşelgäniň golaýynda ýerleşýän we internet hyzmatyny berýändigi üçin palestinalylaryň gelim-gidimli ýeri bolan kafeni nyşana aldy.
Saglygy gorayş işgärleri ady agzalan hüjümde 10 adamyň ýogalandygyny we köp sanda adamyň ýaralanandygyny habar berdiler.
Ysraýylyň goşuny bolsa Gaza zolagynyň demirgazygynda Palestinanyň garşylyk toparlary bilen başdan geçirilen çaknyşykda 4 esgeriniň ölendigini mälim etdi.
Şeýle-de Ysraýyl, Siriýanyň Homs welaýatyna howa hüjümini gurady.
Ýerli çeşmeleriň berýän maglumatyna görä, Ysraýyl, Homsyň günortasynda ýerleşýän Şinşar obasyna howa hüjümini gurady.
Ysraýyl tarapyndan häzire çenli hüjüm hakynda hiç hili maglumat berilmedi.
Emma,Yslam Hyzmatdaşlyk guramasynyň we Arap ligasynyň nobatdan daşary ýagdaýda geçiren bilelikdäki sammitiniň jemleýji jarnamasynda, BMG-nyň Howpsuzlyk geňeşine, Gaza Sektorynda hüjümleriň bes edilmegi üçin degişli karar kabul etmegi dogrusynda çagyryş berildi.
Saud Arabystanynyň paýtagty Riýatda arap we musulman ýurtlaryň liderleriniň gatnaşmagynda geçirlen bilelikdäki sammitden soň jemleýji jarnama kabul edildi.
Jarnamada, Ysraýylyň halkara hukugyny basgylamaga dowam edýändigi nygtalyp, BMG-nyň degişli çäre görüp bilmändigi we halkara jemgyýetçiliginiň bu meselede üstünlik gazanyp bilmändigi nygtaldy.
Jarnamada, Howpsuzlyk geňeşine, Gazada hüjümleriň bes edilmegi we ynsanper kömeginiň Gaza girmegine rugsat berilmegi üçin degişli kararyň kabul edilmegi barasynda çagyryş berildi.
Jarnamada, Ysraýylyň eden jenaýatlarynyň garaşsyz topar tarapyndan barlanmagy talap edildi.
Jarnamada şeýle hem Halkara Adalat diwanynyň kararlary ýatladyldy we şol kararlaryň gysga wagtda ýerine ýetirilmegi talap edildi.
