Hokuməti ımsor iğtisadiyyati ko sahədə nailiyyət bə dast vardəşe

Prezident İlham Əliyevi dekabri 15-minə ruji Sumğayıt şəhəri Kimya Sənaye Parkədə tojə muəssison binonoə və obemonə mərasimədə iştirak kardışe.

İştə votemonədə ımsor Azərbaycani iğtisadi  nailiyyəton, idxalio jidastiəti  kam be barədə qəp jeşe. Votışe ki, ımsornə 11 manqədə qeyri-natə sahədə 3,5%, di təsərrufati sahədə 4% peros bə dast vardəmone.Valyuta ehtiyat şe-şe ziyod bedə, maliyyə vəziyyətən sabite.

Mustəğilə iğtisadşunason bə prezidenti ım curə tarifinə qəpon аnəhoyən bovə kardedənin. Әvon de konkret rəğəmon nişon dodən ki, çe postsovet devləton arədə Az.R yekanə məmləkəte ki, ımsor çey umumdaxili məhsuli miğdar de ponə sori nisbətədə bə kam bıə. Respublika Statistika Komitə məlumatonədən ım nəticə 1% bə kam bıe etiraf kardə bedə.

İmsor bə Respublika zəruriə ərzağ məhsulon idxalən xeyli ziyod bıə. "Azadlıq.info" bə Devlətə Kemruqə Komitə rəsmi məlumati istinadən nıvıştedə ki, ımsornə 11 manqədə bə məmləkət qujdi idxal 63%, şıti idxal 79%, umumən heyvandarəti məhsulon idxal 46% ziyod bıə. İm curə vəziyyət bə ruən, ğənd, çay, taxıli idxaliən aide. İmsor çe xarico ərzağ varde ro 1 mld. 255 milyon dollar vəsait lozim bıə ki, ımən bə ponə sori nisbətədə 60 milyon dollar veye. 5 sor çimi bə nav isə bə məmləkət 950 milyon dollar məbləğədə ərzağ idxal bedəbe ki, ımən ımsornəsən 300 milyon dollar kam bıe.

Ermənistani ərazi Azərbaycanisən təğribən 3 kərə kame, əmo əv çe Azərbaycanisən 2,6 kərə vey tərəvəz, 2,9 kərə vey kərtof istehsal kardedə. Azərbaycan bəştə lozim bıə ərzaği  cəmi 50%-i ıştən istehsal kardedə.