Xarici şirkəton Az.R tərk kardedən
2017-minə sori 15 qılə xarici şirkət Az.R tərk kardəşone. Çəvon əksəriyyət de inşaat və muhəndisəti məşğul bıə muəssisonin. Əliyev hokuməti elan kardə "Strateji Poy Xəritə"də tosə 2025-minə sori məmləkəti şəhəronədə, məxsusən Bokuədə xeyli inşaatə ko nəzərədə qətə bedə.
Vəhədənə sori budcə vəsaiti 38%-i bo inşaati co karde bə nəzər bısənəmon inşaat və muhəndisə profilinə muəssison məmləkəti tərk karde təəccub bə əməl bəvarde.
Meydan TV ım şirkəton bəzi qılon barədə məlumat doəşe. Çe Almaniya “Obermeyer Project Management” şirkət 2012-minə sori Bokuədə Kristal Zali layihə-smeta sənədon hozo karde ro 2 milyon 600 həzo mənotinə, 2013-minə sori Boku Konvensiya Mərkəzi inşaati layihə və menecetment tenderon ğalib bıə.
Çe Turkiyə “Kutlubey Harita İnşaat Mühendislik Sanaye Ticaret LTD” 2011-minə soriku Az.R-də fəaliyyət nişon dodəbe. 6 sorədə 5 qılə tenderi ğalib bıə ki, ım tenderon umumi məbləğ 87 milyon mənotisən vey bıə.
Çe Almaniya “HeidelbergCement”, Yaponiya "Toyo Engineering Corporation”, İsveçi “Teliasonera”və həniən co şirkəton Azərbaycanədə ıştə filiafon dəbaste elan kardəşone. Əvon ım ğərori səbəbon izah kardəşon ni.
"Azadlıq.info" saytiən hokuməti tenderə duqələbazəti həxədə məğalə dərc kardəşe. Nəğliyyat və Rabitə Vəzarəti təşkil kardə tenderonədə maliyyə kapital 2 mənot və 10 mənotinə tojə onoəbıə şirkəton ğalib ome barədə nıvıştəşe.
