Boku hokuməti bo İspaniya Futbolə Federasiya sponsorəti karde fikir hestışe
İsət jıqo qıley vəziyyət bə əməl omə ki, Az.R cəmiyyət çe hokuməti bədxarcə, bə xalqi mənafe zidd əməlon barədə xariciə KİV-ku xəbə qətedə. Çe İspaniya "As" nominə nəşr xəbə dodə ki, Az.R 5 sori muddətədə bo çıvrey Kral Futbolə Federasiya sponsorəti karde bəştə ehdəş peqəte, bımi ro bəvon 50 milyon dollar pul doe pidəşe.
Əmo İspaniya milli futbolə komanda 2018-minə sori cempionatədə iştirak karde məsələ hələ həll nıbe səbəbiku, de Azərbaycanı jıqo muğavilə dəbaste bə təxir eqıniə. Girəm çe İspaniya vəhədənə mundialədə iştirak musbət həll bıbo, Azərbaycani sponsorəti çe İspaniya Futbolə Federasiya taixədə ən bohoə muğavilə bəbe.
"Azadlıq.info" de ım bədxarci əlağədar AXCP sədr Əli Kərimli fikir bə əhandon edaştəşe. Kərimli de sarkazmi votəşe ki, hokuməti bo İspaniya i qılə klubi sponsorəti vəs kardəş ni, ısət bə çə məmləkəti həmə futboli inkişafi komək karde fikir dəqıniə. Iştə şəhrıvandon sosial muavinəton, şəhidə ailon, Ğərəboği əlilon sığorta pulon bıridə, cərimon ziyod kardedə, həmonə pulon bardedə bə İspaniya dodə ki, çəvrey futbol inkişaf bıko.
Əlavə vote lozime ki, İlham Əliyevi hokumət bə beynəlxalğə futboli jıqo sponsorəti karde iminə kərə ni. Bo Avropa çempionati 70 milyon dollar, bo həmonə İspaniya "Atletiko" komanda 20 milyon, bo İtaliya co qıley futbolə komanda 40 milyon dollar devləti xəzinə pulon xarc karde çe respublika ictimaiyyəti yodədey.
Şəhrıvandon vədə ıştə sosial ehdədarion bə vırə rosnie ro pul peydo karde nızınə hokuməti bə xariciə devləton əyləncə tədbiron anədə xəzinə vəsaiti xarc karde ğeyri-məntiği qıley əməle.
