Dindarə xanım bə "Bandotdel" vanq kardəşone

Mısılmonon İbemonə Hərəkati uzv Elnurə Zeynalova dekabrə manqi 21-minə ruji bə Daxili Koon Vəzarəti de Mutəşəkkilə Cinayətkariəti Mubarizə Sər İdarə vanq kardəşone.

Xalq bə ım idarə bə çey həvəşiə hərəkəton qorə "Bandotdel" votedə. Bə Nardarani əhali və diqər məntəğon imoninə odəmon ım idarə həmkaron divon qətəşone, həmən de şiə dini fəalon bı idarədə ğeyri-insonə rəftor kardəşone, bəvon dəhşətvardə işqəncon doəşone.

Azadi Radio xəbə dodə ki, Elnurə xanım 3 saati muddətədə təhğiğ kardəşone. Votəşone ki, əqər ıştə qətə royku onıkırio, eyən bənə Əhsən Huruzadə bə dırozmuddətinə zindonə cəzo məhkum bəkarden. Elnurə Zeynalova çe "Milli Şura" mitinğ və tədbironədə iştirak kardedə, de çəvon, həmən dini fəalon daima əlağə oqətedə.  Çimi bə navən əvşon de çey dini və siyasi fəaliyyəti əlağədar çand kərə bə Sabunçi Rayoni Polisə Şebə vanq kardəşonbe.

Boku Qonə Cinayəton Məhkəmədə "Kanal 13" internet televiziya direktor Əziz Orucov bə 6 sor muddətinə zindonə cəzo məhkum kardışone. Orucovi məhkəmədə bə çey əleyh bə nav doə ittihamon rədd kardəşe, hiç qıley cinayət nıkarde votəşe.

13 numrəninə zindonxonədə çe nadzori Fərhad nominə qıley Sabirabadıjə məhbusi kue-kue kışte barədə "Azadlıq.info" xəbə dərc kardəşe. Bə H.Əliyevi heykəli şuar nıvıştə məhbus Bayram Məmmədovi bə çəvon ım həvəşıə hərəkəti etiraz kardəşe. Nadzoron əvşonən kuə və bə karser dənoənone.