Məktəbi direktori boçi intihar kardışe
Qeyçay şəhəri 9 numrəninə məktəbi direktor Akif Ğəribovi bəştə ğəsd kardəşe. Iştə kəşi damar bıriəşe. Təcili bə mərizxonə rosniəşone, çey jimon xilas karde mumkun bıə.
Həmonə ruji Rayoni Çayarxı diy məktəbi direktor Mubariz Şamiloviən infarkti jəşe. Əvşon bo mualicə bə Boku bardəşone. Əmo çey jimoni xilas karde mumkun bıə ni. "Azadlıq.info" nıvıştedə ki, Şamilovi nezə odəmon eyən bəştə ğəsd karde votedən.
Rayonədə qəp heste ki, ım bəştə ğəsdon səbəb Qeyçayi İcra Hakimiyyəti sərdar Mehdi Səlimzadə məktəbi direktoronku 20 həzo mənot rışvə tələb kardeye. De ım hadison əlağədar Rayoni Prokuroturadə təhğiğat bino kardəşone.
Az.R-ədə bə İçra Hakimiyyəti sərdarəti vəzifə odəmon çe Prezidenti tərəfo təyin bedən. Bə ım hakimiyyəti dair Əsasnamə rayoni həmə devlətə təşkilaton, prokuraturan əz-cumlə, bə icra sərdari tabe kardedə. Çimi məna əve ki, Prezidenti təyin kardə sərdar həmonə rayoni mutləğ hakime, ğeyr-əz prezidenti bə hiç kəsi tabe ni. Jiqo vəziyyətədə rayoni prokuror bə icra sərdari munasibətədə cinayətə ko çı curə bino karde bəzıne.
Səlyoni İcra sərdariən bə rayoni idarə və təşkilaton, umumtəhsilə məktəb və tibb məntəğonən həmçinin, pambə plan jəşe. Im muəssiə rəhbəron bə İcra hakimiyyət vanq kardəşone, çəvon vədə tələb noəşone ki, har muəssisə bo vəhədənə sori 5 hektar pambə kaştənin, perosnənin və çey məhsuli təhvil doənine.
Əliyev hokuməti məmləkətədə pambəvonəti inkişaf kardovnie siyasəti bə meydon şodoədə əhali vədə jıqo məcburi mukəlləfiyyəton bə əməl ome hiç kəs bəştə ağıli vardedənıbe.
