Nardarani hadisə məhbuson məhkəmədə bəvon orəxnə sıxani vote ro imkan nibədon
Dekabri 22-minə ruji Mısılmonon İbemonə Hərəkati (MİH) sədri muavin Elçin Ğasımov və çey 11 nəfər həmməsləkon məhkəmə de vəkilon mudafiə votemonon dəvom kardışe.
Çe ƏmirƏli Əliyev və Əli Şahbazovi vəkil İradə Cavadova ıştə məntiğinə nitğədə bə ittihamon soxtə be dair xeyli subut və dəlilon vardışe. "Vetenugrunda.az" sayti çey ım votemoni tam mətn bə əhandon nəzə rosniəşe. Cavadova votəşe ki, MİH-i bənə mutəşəkkilə cinayətkarə dastə ittiham karde ro hiç qıley konkret fakt ni. Əvon bo ğeydiyyati ro 2 kərə bə Ədliyyə Vəzarəti muraciət kardəşone. Cinayətkarə dastə ıştə fəaliyyəti ğeyri-leqal təşkil kardedə, bo ğeydiyyato dəvarde muraciət kardedəni. Ə kitobçən ki bə Taleh Bağırzadə nom anqıl kardə bedə, əyo çe Nardarani hadison, bə Elçin Ğasımovi, bə Elman Ağazadə qonə işqəncon doeku sıxan şedə. Çimiən məntiği nəticə ıme ki, ya Taleh Bağırzadə həmonə kitobçə çe Bandotdeli podvalədə nıvıştəşe, yaanki, co kəson bə çey nom tərtib kardəşone.
Məhkəmə iclasi orəxədə hakim Mayıl Bayramovi votəşe ki, tosə dekabir orəxi proses bə axır rəsənine. Im bə muttəhimon etirazi səbəb bıə. Çunki, əvon ıştə orəxnə sıxan votəşon ni. Hakimi elan kardəşe ki, bə məhbuson ım inkani nibədo. Məhkəmə nubətinə iclas dekabri 25-ədə dəbəvarde.
AİP -ən ıştə Sər Məclisi iclas dəvuniəşe. Partiya sədri əvəz Hacı İlham Əliyev, Məçlisi uzv Hacı Akif Heydərli, AİP Zənənon Şura sədr Nevrəstə İbrahimova və həniən co fəalon ıştə votemononədə bə Ğudsi məsələ munasibət, AİŞ plani iflas bıe votəşone. İclasi orəxədə Partiya bə Ğudsi dair bəyonnomə ğəbul kardəşe.
