Bə Nardarani faciə 12 nəfər məhbusi 154 sor zindonə cəzo bırişone

Dekabri 26-27-28-minə rujonədə Mısılmonon İbemonə Hərəkati sədri muavin Elçim Ğasımov və çey 11 nəfər həmməsləkon muhakimə orəxnə iclason dəvardin. Muttəhimon ıştə orəxnə sıxanon votışone, bə çəvon əleyh ittihamon rədd kardışone.

Elçin Ğasımovi votışe ki, dekabri 26-minə ruji məhkəmə iclasi munağişədə iştirak kardə 3 nəfər məhbus bə kars dənoəşone, bə təcridxonə rəisi dəstur doəşone ki, bəvon işqəncə bıdo. Ey ım ğeyri-ğanuniə hərəkəti təhğiği xahiş kardəşe, həmən ğeyd kardəşe ki, çəmə cism zindonədey. Bə çəmə mənəviyyati zəncir je mumkun nıbə koe.  Nahid Ğəhrəmanoviən votəşe ki, məhkəmə mustəğil ni, bə hakimon petono de telefoni çı dəstur dodən, hakimonən jəqo hərəkət kardedən. İsa İbrahimovi ıştə orəxnə sıxanədə hokuməti zindonədə əvoni bə vəhabion kue doe ğeyd kardəşe.

Prosesi orəxnə ruji hakimi məhkəmə hukm ehandəşe. Elçin Ğasımov və AğaƏli Yəhyayev hər kəs bə 15 sor, Nahid Ğəhrəmanov 13, İsa İbrahimov, Fərhad Muradov, Elqun Axundov, Vusal Alışanov, Seyfəddin Şirvanov har kəs 12 sor 6 manq, Əli Şahbazov, Seymur Aslanov, Ramil Əliyev və ƏmirƏli Əliyev  har kəs bə 12 sor 3 manq muddətinə zindonə cəzo məhkum kardəşe.

Çimi bə navən Taleh Bağırzadə və həniən 17 nəfər 10 soriku tosə 20 sori, Zulfiğar Mikayılzadə və həniən 11 nəfər 12 soriku tosə 17 sori bə zindonə cəzo məhkum kardəşonbe.

Demiən 2 sor dəvom kardə Nardarani faciə məhbuson məhkəmə proseson bə orəx rəse.  Hokuməti bə şiə fəalon de divon qəte məğsədi ıştə təşkil kardə əməlon tamamən bə vırə rosnişe.