Ərağçi: Britaniya de təcavuzkoron bıə har qıləy həmkoəti ğəbulbənin ni

Pars Tudey-İroni xarici koon vəzir de Britaniyavıjə həmko bə ico bıə telefonə votemonədə de təcovuzkoron bıə har qıləy həmkoəti ğəbulbəninış zıne və Londoni bə İroni ələyh noloyığə nəzə sənibəton nəzəku dəvordıneyış tələb kardə.

Pars Tudey bə İroni Tele-Rədyo Şirkəti istinodən doə məlumoti əsos,İroni İslomi Respublikə xarici koon vəzir Seyd Əbbos Ərağçi və İbıə Kraləti xarici koon vəzir Ed Miliband de telefoni dıtərəfinə məsələon və oxonə reqiyonal və beynəlxalğə inkişofonışon mızokirə iyən məsləhət kardəşone.Bın sehbətədə Ərağçi çı İbıə Kraləti bə İroni ələyh noloyığə nəzə,ə cumlə həm çın kişfəri çı İroni İslomi Respublikə silohinə ğıvvon elon kardə oxonə ğətnomə beəsos və bevəcış hisob kardə və çı Britaniya hukuməti bın məsələdə sənibəton nəzəku dəvordıney vocibəti təkid kardəşe. Əy,çe AİŞ-on və seonist rejimi bə İroni ələyh hərbi təcavuzış reqiyonədə bənə mevcudə vəzyəti əsosə amili zikr kardə holədə bəyonış kardə:İroni İslomi Respublikə bə diplomatikə prosesi de xoşə niyyəti daxil bıə və xordadə manqi 28-ədə canqi bə oxo rosneyro təfahumış bə dast vardə, lakin AİŞ ijən sənibəton ıştə vədış darıştə və bəçəy bə həyot dəvordıney mane bıə. Ərağçi İroni Hormuzi tanqədə bo kəştiromey trafiki idorəbənav oşko kardey və həvo hucumiku mıdofiyə təchiz kardey və silohin bey proqrami bə jimon dəvordıney surətin kardey əmri doey elonış kardə.kardero de Omani həmkoəti çərçivədə bə əməliyyoti mexanizmi icod kardey əzmi təkidış kardə və bəyonış kardə:In proseəsdə seminə tərəfon maneyə icod kardey mevcudə vəzyəti həni həm saxt bəkarde. Ərağçi ğeydış kardə:Bə beynəlxalğə huğuği və təcovuzi mıəyyən kardə ğətnomə əsosən, təcavuzkoron çe qıləy kişfəri əraziku və obyektonku istifodə kardə holədə,bə co kişfəri beğanunə hucum kardey icozə doey təcovuzi akt hisob kardey beydə və bə hucumi məruz mandə kişfəri bə ışənimıdofiyə dast ğandey imkoni doydə.