Az.R -ədə İronəfobiya mərəz

İronədə dəvardə siyasi aksion Az.R-ədə bə muxtəlifə reaksion səbəb bıe. Respublika rəsmiyon munasibət iğtişaşiə hərəkəton bə orəx rəse bə peştə bəyon bıe. Xarici Koon Vəzarəti Mətbuat xidməti səviyyədə votışe ki, İronədə hadison de sulhi həll bıe orzu kardedəmon.

Məmləkətədə ictimai rayən bə Boku hokuməti rəsmiyon jıqo munasibəti müvafiğ bıe. Çe Az.R İronədə sabiğ səfir Nəsib Nəsibli  ıştə bə Meydan TV musahibədə votışe ki, "ım aksion təşkil kardə lider və təşkilaton hestin, nezə vaxtonədə Azərbaycani əhandon çəvon nomon bəməsen". Çey ım votəyon  Rusiya  Tolışə diaspora təşkilati sədr İsmail Şabanovi "Realist" saytədə dərc bıə məğalədə votə jıqo qıley fikr təsdiğ kardışe ki, ım iğtişaşon təşkil kardə mərkəz hejo Bokuədəybən.

Az.R mustəğil be bəpeştə devləti səviyyədə ıştə şəhrıvandon arədə daima İranofobiya təbliğat bardəşe, dərsəkitobonədə tarix soxtə, bə ətrofi xalğon nifrət ruhədə nıvıştəşe. Isət ım zəhərinə təbliğati nəticə Respublika ictimai fikirədə oşko vində bedə. "Arannews.com" sayt bəştə əhandon de jıqo qıley suali muraciət kardedə ki, Az.R -də dekabri 31-minə ruji bənə dınyo azərbaycanıjon həmrayə ruji ğeyd kardedən. Həmonə ruji çe İroni azərbaycanıjon "Zəncan, Təbriz, Ərdəbilədə izdihaminə şemon təşkil bıe,  əvon ıştə bə devləti rəhbər Ayətullah Xamenei sədağət və məhəbbət numayiş kardışone". Bəs İroni tırkon həxi tələb və həmrayəti ruji ğeyd kardə həmonə odəmon boçi de zəncanıjon, ərdəbilıjon, təbrizıjon həmonə ruji həmrayəti numayiş, çəvon tələb və şuaron mudafiə nıkardışone. Turkiyən İroni rəhbəriyyət mudafiə kardışe. Əqər Az.R cəmiyyət həğiğətən çe tırkon vəhdəti tərəfdare, bəs boçi de Turkiyə ım məsələdə həmrayətiş nişon nıdoe?

Sayti noə ım məntiği sualon əlbəttə ki, Az.R həm rəsmiyon, həmən muxalifəti çanədə dıdimə siyasət barde nuşon dodə.