"İroni xalq və islami nizom har cəhəto AİŞ məyus bəkarde"
İronədə siyasi vəziyyət ışət çe dınyo ictimaiyyəti diğğəti mərkəzəde. Ali Rəhbər Ayətullah Seyid Əli Xamenei bə İslami Təbliğati dair Koordinasiya Şura uzvon vindemonədə məmləkətədə dəvardə rujon vağeə bıə hadison həxədə qəp jəşe.
"Maide.az" bə "Leader.ir" sayti istinadən bı barədə xəbə doəşe. Ali Rəhbəri votəşe ki, İslamə İnğilabiku dəvardə 40 sorədə İroni xalqi çe deşmenon çanədə çırkinə planon darıştəşe, co xalqon dəvarde nızınə mışğılon həll kardəşe. Isətnə şəraitədə rəğib tərəfi əsasə məğsəd xalqi bə ayəndə inkişafi naumid karde, çey bovə sındınieye. Bımi ro de sosial şəbəkon vasitə bə İroni nailiyyəti əleyh soxtə rəğəmon, pesoxtə fakton pevolo kardedən ki, məxsusən cıvonon bədbin bıkon. Təəssufinə koe ki, məmləkəti daxilədə bəzi qruponən bə deşmenon təsiri ji eqıniən, çəvon dıvuə qəpon təkrar kardedən. Əvon çe Xıdo, dini və ədaləti həxi icra nıkardə odəmonin.
Rəhbəri həmən ğeyd kardəşe ki, problemon tənğid karde lozime, əmo ım tənğidon ədalətin və konstruktiv bənine. Tənğid zəruri, həmən vacibe, lakin bıhton və şər ittihamon həromin.
Ayətullah Xamenei ağa Vaşinqtoni bə DAİŞ-i dastəq doe, de Yəməni beqınoə əhali ğətliam kardə Səudon həmkarəti, sionistə rejimi mudafiə karde çe Amerika xərobkarə təbiəti bə oşko bekarde bə nəzə rosniəşe. Votəşe ki, "bovəm heste, İroni xalq və islamiə nizam de Xıdo koməki har cəhəto AİŞ məyus bəkarde".
