Az.R-ədə muğəddəsə ziyarətə səfəron təşkil kardeyən bə monopoliya ji dənodən

Az.R-ədə iğtisadiyyati, ictimai -siyasi jimoni həmə sahon çe devləti və ya çe oliqarxiya sərt nəzarəti jitono be bə har kəsi çok məlume. Əmo tosə ısət hiç kəs qımon kardedənıbe ki, bə Kərbəlo və Məşhəd ziyarət səfəri təşkil kardə muəssionən bə monopoliya ji dənoe cəhd bəkarden.

"Press.az" sayti Respublikadə ım fakti mevcud bıe həxədə məlumat pevolo kardəşe. Çey ım məğaləku məlum bedə ki, Respublika daxilədə jiqo siyasət bardedən, əhali bə ım müğəddəsə ocəğon səfər karde ro çəvon siyahiədə ğəror ğətə 6 qılə təşkilaton xidmətku istifadə bıkon. Çe İraği Boku səfarətən hətto bə fərdi odəmonən viza dodəni, votedə ki, bışon çe həmonə firmonku viza peqəton. Bəə firmonədən viza ğıymət çe səfarəti ğıymətisən 2 kərə bohoe.

Bo Az.R şəhrıvandon bə Məşhəd və Kərbəlo ziyarət şe ro Boku hokuməti təşkil kardə beğanuniə vəziyyət de ımi orəxedəni. "Eşğə səfər" Məhdud Məsuliyyətinə Cəmiyyəti sərdar Fəxri Həsənov ki, çey firma nom həmonə siyahiədə ni, bə İlham Əliyevi qıley video muraciət vığandəşe. Fəxri Həsənovi bə "Xeberman.com" sayti votəşe ki, Devləti Əmniyyətə Xidməti həmkaron çəvonku bə Məşhəd şə zəvvaron har kəsi ro 10 dollar, bə Kərbəlo şəkəson har kəsi ro 20 dollar məbləğədə rışvə tələb kardedən. Həmən bəvon tars omedən ki, əqər ım məbləği nıdon, çe kemrukiku dəvarde nibəzınen, əqər ım fakti bə cəmiyyəti nəzə bırosnon əvoni bə zindon şobədon.

Həsənov ıştə muraciəti orəxədə votedə ki, çimi bəpeştə bə çey sə jı ğəziyyə bo, bıdə Azərbaycani xalq bızıno ki, məmləkətədə jıqo qıley behəxə vəziyyəti  bə Prezidenti nəzə rosnie bımi səbəb bıə.