Respublika məktəbonədə hicab ijən ğədəğən kardışone

Omə həftə dekabri 12-əku, yəni dışanbə rujiku, bə Hostoro şəhər və rayoni məktəbon xəbə kardəşone ki, de hicabi bə məktəb omə müəllim və şaqirdon bə dərs vanıbədon. Imi bə "Azadlığ radio" rayoni Şiəkon di qıley valideyni votəşe.

"Maidə.az" sayt bə "azadlıq.org" i istinadən xəbə dodə ki, nə Rayoni İcra hakimiyyət, nə təhsil şebə bı barədə məlumat doəşon ni. Əmo Şiəkon məktəbi müəllimon ım fakt təsdığ kardəşone. Məktəbi bioloqiya müəllim Yunus Ğolamovi votəşe ki, icra nümayəndə bə məktəbon xəbə vığandəşe ki, bə məktəb təftiş bome, bə səbəb i həftə bə məktəb be hicab boənən. Şərf dəbastən, kolo sənənən, əmo hicab sənoe ğəti ğədəğəne. Yunus müəllimi həmən votəşe ki, "Soveti devrədə çəmə din ğədəğən kardəşonbe. Isət ım hokumət vey vaxte çe arə beşə, əmo bə çəmə dini əğidon ğədəğə hələən mandə. Boçi xristian məmləkətonədə bə mısılmonon hicab ğədəğən ni, mısılmonə məmləkətədə ğədəğən kardedən. Kəsi ıştə sə edodə, co xonəxo çimiku norohət bedə. Im çı məntiğe?"

Dekabri 8-minə ruji Lankonıjə ruhani Ğismət İsayevi məhkəmə bə orəx rəsə. Əvşon de ğeyri-ğanuni silah və sursat oqəte vonə bə 7 sornə zindonə cəzo məhkum kardə. Ğismət İsayev ım sor apreli 19-ədə Lankonədə dəstqir kardəşonbe. İm çey 2-minə məhkumiyyəte. Az.R məhkəmə 2011-minə sori bə AİP divon qətə vaxtonədə əvşən bə 1 sor 6 manqə zindonə cəzo məhkum kardəbe.

Boçi xristianə məmləkətonədə bə islami anədə təzyiğon nin. Əmo pərçəm və qerbədə islami simvol bə Az.R devlət bə ıştə şəhrvandon dini mənəviyyati bı ğədər deşmenə münasibət nişon dodə.