Alpiniston tələf bıe qıno çiki qiyəde
Soveti vaxtonədə qıley ənənə hestbe ki, bə bandi barzə haymi partiya və devləti rəhbəron nomi əden. Pamirədə bə Lenin və Stalini nom jıqo haymon hestbin.
Az.R-ədən Prezident İlham Əliyevi şəxsiyyətə pərəstiş bə qıley hədd rəsə ki, 2008-minə sori de sabiğ MƏV-i sərdar Eldar Mahmudovi təşəbbusi bə Ğuba rayoni qıley bandi barzə bəşi İlhami nom doşone. 2009-minə soriku de prezidenti təvəlludə ruji munasibəti bə həmonə haym har sor məmləkəti alpiniston səfər təşkil kardedən. 2015-minə soriku MƏV ləğv bıe, əmo çey sərdari noə pərəstişə ənənə ıstən dəvom hestışe.
Imsornə dekabri 24, yəni İ.Əliyevi moəo bıə ruji həvoşunason bədə həvo proqnoz dodəbin. Əmo Boku hokuməti toyfə məmuronədə hiç kəsi Prezidenti təvəlludi təbrik kardə ım panziə ənənə darışte çurət nıkardışe. Çe "Qiləvo" vərzeşə klubi 3 nəfər alpinist- Fəridə Cəbrayılzadə, Babur Huseynov və Namin Bunyadzadə bə jıqo qıley xətomandə avantura vığandışone. Dekabri 24-ku dəvon rabitə ğət bıə. Çimi 3 ruji bədiqə çe Fevğəladə Halon Vəzarəti həmkaron əvoni xilas kardə koon bino kardəşone. Alpiniston valideynonən bə İlhami muraciət vığandəşone ki, çəvon fərzəndon xilasi ro lazımi dəsturon bıdo. İm faciə tosə ısət Respublika cəmiyyəti diğğəti mərkəzəde.
Azadi radio xəbə dodə ki, Boku hokuməti Avstriya Daxili Koon Vəzarəti bandı-kuhədə xilasəkə xidməti mutəxəssison bə ım ko cəlb kardəşe. "A24.az" saytən nıvıştedə ki, çe Turkiyə xilaskarə xidmətiən bı koy cəlb karde təklifon hestin. Çəvon 10 nəfərədə ibarət mutəxəssisə heyət Boku hokumətiku rəsmi muraciəti bə çəşe. Əvonən təcili ğaydədə bə xilaskardə əməliyyaton umjən qınie hozon.
