Sumğayıtədə nun həvate səpe monopoliya

Sumğayıt şəhəri İcra Hakimiyyəti sərdar Zakir Fərəcovi nezə odəmon bı şəhərədə qıley nunə zavod dutəşone. Şəhəri market soybon bə İcra Hakimiyyət vanq kardəşone, bəvon votəşone ki, həni Boku muəssison patə nuni ne, Sumğayiti zavodi istehsal kardə nunə məhsulon bəhavaton. Im məlumat bə "Finans.az" sayti həmonə marketon soybonədə i kəsi doəşe.

Boku çand qılə nunpatə zavodi rəhbəron ki, ıştə məhsuli i hissə Sunğayıtədə həvatedəbin, de ım monopoliya əməli əlağədar bə İğtisadi İnkişafə Vəzarəti şikayət vığande məğsəd hestışone.

Meydan TV xəbə doəşe ki, yanvarə manqi 8-ku Ro Patrul Xidməti həmkaron çe Bokuku bə Sumğayıt nun bardə maşinon bə cərimə meydonçə bardedən. Demiən bəvon nuni bə Sumğayıti marketon təhvil doe imkan dodənin. Sumğayıtədə mıştərionən məğəzenonədə Boku zavodon patə nuni nıbe votedən.

Sumğayıt Səhəri İcra Hakimiyyəti numayəndə bə "Publika.az"i cəvobədə votəşe ki, Boku zavodi nunon şəhəri marketonədə nəhavateədə İcra Hakimiyyəti hiç qıley mudaxiləş ni. Əvon jıqo qıley çəvob həmən bə BBC Azərbaycani muxbiri votəşone. BBC muxbiri bı problemi dair qıley reyd dəvuniəşe. Binə nunə zavodi şofer Sədayil Babazadə votəşe ki, Sumğayıti marketon həni Bokuədə vardə nuni ğəbul kardedənin. Votedən ki, Şəhəri rəhbəriyyəti bəvon ım, ğədəğən kardəşe. Muxbiri  Sumğayıti nun həvatə məğəzenon həmkaronku xəbə səşe, çəvonədə bəzi kəson jıqo ğədəğə mevcud bıe təsdığ kardəşone.

 Ğeyd karde lozime ki, İcra Hakimiyyəti sərdaron Prezidenti tərəfo təyin bedən, şəhəri həmə devlətə orğanon bey tabein. Im qaydən bə jıqo monopolistə vəziyyəti səbəb bedə.