Boku hokuməti bə İroni tərəf qardış

Yanvarə manqi 13-minə ruji İron İslamə Respublika Boku səfarəti vədə i qrup dini fəal bə Rəhbər Ayətullah Seyid Əli Xamenei dastək aksiya dəvuniəşone. Əvon "Huseyncion huşyarin, çe rəhbəri peştədən", "Salem bıbo Rəhbər, bıjio Rəhbər", "Rəhbəri deşmenon məhv bıbo" şuaron votəşone, ıştə dastədə çe Ayətullah Xomeyni və Ayətullah Xamenei şəkilon , "Azərbaycani dindaron de şımən", "Əmə de şıməmon, çəmə əzizə rəhbər" nıvıştə plakaton ros kardəşone.

Polison tərəfo bə ım aksiya mudaxilə və maneə bıə ni. Im xəbə və aksiya video vindəyon "Nur-az.com" sayti pevolo kardəşe.

Əmo  dindaron jıqo qıley siyasi aksiya asudə və bemaneə dəvunie hiçən Boku hokuməti bə dini fəalon loyal və praqmatuk munasibəti nışonə ni. Çunki hejo həmonə ruji, yəni yanvari 13-ədə ey bə Mısılmonon İbemonə Hərəkati 3-minə sorəqardışə tədbiri dəvunie imkan doə nişe. Təşkilati uzvon bı barədə bə "Azadlıq.info" sayti məlumat doəşone ki, ım tədbiri dəvunie ro qıley məkan vıjniəmon bıe. Bo tədbiri bino bıe nim saat mandə həmonə məkani soybi zanq kardışe votışe ki, bey təhdidon hestin, hələ-bulə omedən ki, əqər ım tədbiri ıştə muəssisədə dəvunie imkan bıdo, ım bo eyo vey boho bə sə bome.

Imən məlume ki, bə Mısılmonon İbemonə Hərəkati sədr Taleh Bağırzadə 20 sornə zindonə cəzo elan karde bəpeşt ey zindonədən dinc oqətedənin. Bə çey əleyh dıminə cinayətə ko oj kardəşone. Həmən əv çe zindoni koəkon tərəfo bə fizikiə təsiron məruz mandedə.