AİP bə İroni xalqi həmdardi izhar kardəşe
Yanvarə manqi 6-minə ruji Çini Şərğiə dıyoədə qıley ğəzo vağeə bıe. Çe Honq Konqi bokırniə kəşti bə İroni natkırniə "Sançi" kəşti okkue nəticədə, "Sançi"ədə qıley yolə otəşsuzi bə əməl ome. Çini və İroni xilaskardə komanda ım fəlakətvardə ğəzo nəticə vəy se ro ıştə dasto omə imkanonku istifadə kardəşone, əmo çe İroni kəşti heyəti xilas karde mumkun nıbe. "Sançi" tankeri 32 nəfərədə ibarət ekipaji uzvon həlok bin.
De ım mısibəti əlağədar İroni hokuməti yanvari 15 dışambə məmləkətədə matəmə ruj elan kardışe. İroni Yolə Rəhbər Ayətullah Seyid Əli Xamenei, Prezident Həsən Ruhani həmən diqər aliməğamə vəzifədaron bə həlokbıəkəson nesə odəmon dılvandi doşone və bə cəmiyyəti ım ğəmi həmdard bin.
Az.R - ədən ım ğəmvardə hadisə çe cəmiyyəti diğğətədə mande. Prezident Əliyevi bə İroni Prezident Ruhani vığandə məktubədə bə ım mısibəti çe Az.R xalqi nomo həmdard bıe votəşe, bo həmonə həlokbəkəson Xıdoku rəhmət piəşe.
Azərbaycani İslamə Partiya sədri əvəz Haci İlhamən de jıqo qonə ğəzo əlağədar bə İroni devləti Ali Rəhbəriyyəti, bə hokuməti, bə İroni xalqi həmdardi izhar kardışe, bə mardəkəson rəhmət, bə çəvon ailə və nezə odəmon dılvandi doşe.
Rusiya "Tolışon diaspora" təşkilati sərdar İsmayıl Şabanoviən ıştə "Fasebook" səhifədə bə ım matəmi həmdardi nıvıştışe, çe həlokbəkəson "ruh şod, xotoşon qiramin bıbo" votışe.
