Hokumət dionədə məcburi zəhmət tətbiğ kardedə

Prezident Əliyevi Naziron Kabineti orəxnə iclasədə dəvardə sori di təsərrufatı nailiyyəton və bı sahədə 4,1% peros bıe ğeyd kardışe.

Əmo iğtisadşunas - eksperton bə çey ım votəyon bədbin diə kardedən. Toğrul Cuvarlı bə Meydan TV votəşe ki, bə Prezidenti dəsturon muvafiğ ponə sori pambə istehsal xeyli ziyod bıe. Əmo məhsuldarəti saru eqınie. Co kaştekorə zəminon və heyvandarə kəvşənonədə pambə kaşte nəticə ım bıe ki, pambə istehsal ziyodən bıbo, taxıli və heyvandarəti məhsulon istehcal xeyli saru eqınie. Pambəvonəti jıqo de ekstensivə roy inkişaf ım sahədə ko kardə fəhlon zəhməti molyətşən xeyli saru eğande. Məmləkəti de zəruriə ərzaği təchizat  çe idxaliku  bə jidasti vəziyyət eqınie həniən zumand bıe.

İştisadşunas Vahid Məhərrəmli ğeyd kardəşe ki, ponə sori taxıli istehsal 150 həzo ton kam bıə. Xarici vıjorədə taxıli 1 toni ğıymət 130 dollaro bə 190 dollar ros bıə. Çimi mənan əve ki, çe pambə ixracədə bə məmləkət daxil bıə valyutasən xeyli ziyod valyuta bo taxıl hırie ro bə xaric bekarde lozim bəbe.

Pambəvonəti inkişaf həmonə rayononədə bə məcburi zəhməti tətbiğ karde səbəb bıe. Kurdəmir şəhrıstoni budcə təşkilati koəkon bı barədə bə Meydan TV şikayət kardəşone. Jıqo vəziyyət Biləsuvarədən bə meydon beşəbe. Vəkil Cavad Cavadovi votəşe ki, əhali "de ıştə mərami" nomi bə ko məcburən cəlb karde bə MM 2009-minə sori ğəbul kardə "Məraminə fəaliyyəti həxədə" ğanuni, həmən bə Az. Respublika konstitusiya 35-minə maddə zidde. Jıqo vəziyyətədə əvoni bə ko cəlb kardə təşkilat dəvon muğavilə dəbastənin, əvoni sığorta kardənine.

Kurdəmiri İcra hakimyyəti sərdari iminə muavini bə muxbiri suali cəvobədə ım fakt bə həşə jəşe, votəşe ki, əvon hic kəs məcburən bə pambə qırd karde cəlb kardəşon ni. Bı koədə odəmon həmə deştə mərami iştirak kardəşone.