Az.R devlətə orğanon bə dini ekstremizmi əleyh bahəm mubarizə bəbarden

Dəvardə rujonədə bə Dini Təşkilaton dair Devlətə Komitə 2018-minə sori de dini ekrstremizmi ıştə mubarizə dəvom karde əzmi barədə məlumat pevolo kardışe. "Azadi Radio" xəbə dodə ki, de ım məğsədi Dini komitə çe Daxili koon Vəzarəti, Sər Prokuratura və Devlətə Əmniyyətə Xidməti arədə dəvon bahəm vində tədbiron plan hozo və imza kardəşone.

Im tədbiron dini ekstremizmi bə əməl vardə səbəbon çe arə barde, bı istiğamətədə fəaliyyət nişon doə təşkilaton koordinasiya təşkil karde, rayononədə muxtəlif seminar, muşaviron dəvunie, ictimaiyyəti numayəndon bı koy cəlb karde nəzərədə qətedə.

Əliyevi hokuməti orəxnə soronədə bə şion, bə çəvon dini ayin və mərasimon əleyh bardə siyasəti bə nəzər bısənəmon, oşko bəvindemon ki, çe hokuməti ım təşkilaton "dini ekstremizim" ifadə peştono çəvon kom nısığ niyo bedə, və çəvon mubarizə hədəf kom məzhəbi mənsubon bəben. Məsələn, dəvardə soriku Bokuədə bəhayi çərəyani təbliğaton xeyli intişar kardəşe. "İslamazeri.com" hələ dəvardə sori oktyabrə manqədə xəbə dodəbe ki, paytaxti kuçonədə ım sekta təbliğatçion azad surətədə odəmon arədə təbliğat bardedən, ıştə broşura və bukleton pevolo kardedən, bəvon bəştə tədbiron cəlb kardə dəvətnamon dodən. Imiən ğeyd karde lozime ki, bəhaiyon mərkəzi ğərərqoh İsraili Hayfa şəhərədə ğəror qətəşe.

İyo Boku devləti orğanonku xəbə se bə vırə ebəqıne ki, aya əvon de dini ekstremizmi mubarizə şuariku bənə vonə istifadə bəkarden iqlə bə şion divon bəqəten, ya əsil ekstremizmə cərəyanon vəhabion, nurçion, bəhaion fəaliyyəti məhdud bəkarden?