Hokuməti aksizə verqion ziyod kardışe

Yanvarə manqi 23-minə ruji Naziron Kabineti dəvardə sori dekabri 21 tarixinə ğərori tətbiğ bino bıe. İm qərorədə bə Respublika idxal bıə benzini bəzi nevon, alkoqolinə peşoməyon, təməkuə məhsulon səpe aksizə verqion 2 kərəku tosə 4 kərə ziyod kardışone.

95- oktaninə benzini 1 toni aksiz isə 1 mənotiku bə 200 mənot pos bıe. Imən daxili vıjorədə bə həmonə məhsulon ğıyməti boho bıe səbəb bəbe.

Dəvardə sori DSK məmləkəti iğtisadiyyatədə infilyasiya 13%, ərzaği boho be isə 18% nişon doşe. Prezidentiən bımi muvafiğ nıboən dəstur doşe ki,  minimum məvacib 116 mənotiku bə 130 mənot, yəni 12% ziyod kardə bıbo. Naziron Kabinetiən yanvari 17-ədə budcə təşkilaton jinə tarifinə koəkon məvacib bə 130 mənot rosnie həxədə ğəror doşe. Diqər kateqoriya koəkon  ki, de 130 mənotisən bə pe tarifi məvacib sedəbin, çəvon maaşon ziyod nıkardışone. Pensioneron yanvarə manqi pensiyadən peros nıbe, bəvon şifahi votışone ki, fevralə manqədə pensiyon ziyod bənine. Yanvari perosə məbləğiən de fevrali pensiya i vırədə bəsen.

DSK elan kardəşe ki, ponə sori Roy Polisi həmkaron piyodə odəmon 703 həzo, şoferon isə 29 milyon 500 həzo mənot cərimə kardəşone.

İsət yəğine ki, jiqo maliyyə nırəsəy bə sodə şəhrıvandon munasibətədə mevcude. Əliyevi hokumət isə ıştə bədxarcə əməlon bə kam karde fikir nişe. "Azadlıq.info" bə Almaniya "Deutsche Velle" mahnamə əsasən xəbə dodə ki, Fransa hokuməti bo "EXPO 2025" numayişqahi dəvunie musabiğədə ıştə namizədəti maliyyə nırəsəy səbəbiku bə dumo peqətəşe. Isət 3 qılə keşvər - Rusiya, Yaponiya və Az.R ım tədbiri dəvunie iddia kardedən. İyo məzəninə cəhət ıme ki, Yaponiya UDM - 5 trl. , Rusiya UDM - 1,5 trl. Azərbaycaniki isə cəmi 41 mld. dollare. Fransa 1 sorədə 2,4 trl. dollar  məbləğədə məhsul istehsal kardedə.

Im fakt Boku hokuməti çı cur bəştə şəhrıvandon tənəvəc mande oşko nişon dodə.