Şəkiədə dindaron dəstqir kardəşone

Şəki şəhərədə Xan nominə məçiti bə muzey peqordınie ətrofədə ixtilaf yanvari 23-ədə dəvom kardəşe. De ımi əlağədar Azadi Radio xəbə dodə ki, Tojə Azəri İslamə Cəmiyyəti uzvon xeyli vaxte bə ım ğərori etiraz kardedən, de polison çand kərə munağişəşon bıə.

Orəxnə səfə əvon çe şəhəri Ğışləğ məhəllədə "Topğərəğac" məcitədə qırd bıən, polison omən əvonşon tojniə, 7 nəfər ohilə dindar dəstqir kardəşone. Yanvari 23-ədə məhkəmə bə Nazim Sadığov, Cabir lətifov, Ğəzənfər Hacıyev, Yunis Mustafayevi har kəsi  30 sutka, bə 1 kəsi 7 sutka zindonə cəzo bıriəşe, Şirin Babayev və Əfləddin Rizvanov isə har kəsi 200 mənot cərimə kardəşe. Bə məçiti icma uzvon çəşnavi doəşone ki, əqər əvon de dini məsəlon dair Devlətə Komitə bə vahid fikir nıvon, çəvon "Topğərəğac" məçitiən dəbəbasten.

"İslamazəri.com" sayt isə ım problemi co cur izah kardedə. Nıvıştedə ki, Şəki dindaronədə qıley, de ey ənənom oğəte şərti, votəşe ki, ım ixtilafçon de islami əlağə nıbə təriğəti uzvonin. Ruji 2 kərə nomoj votedən, ıştəni Məhəmmədəfəndi nominə qıley ruhani dəvomçion hisob kardedən. Hokuməti numayəndon bəvon rəsmi ğeydiyyato dəvarde təklif kardedən, əmo əvon bımi rozi bedənin.

Dövləti rəsmi təşkilaton isə de ım məsələ əlağədar hələ ki, məlumat bəyon kardəşon ni.

Yanvari 23-ədə dini fəal Əhsən Nuruzadə məhkəmə dəvom kardəşe. Vəkil Fariz Namazlı hal şohid Namət İbrahimovi ruhi noxəşin və 2014-minə soriku ruhi dispanserədə ğeydiyyatədə bıe səbəbiku ey şohidon siyahiku bekarde barədə vəsadət ros kardəşe, əmo hakimi ım təmin kardəşni. Nuruzadən dini və siyasi fəaliyyəti səbəbiku 2 kərə bə inzibati cəzo məruz mande, polison tərəfo 3-minə kərə bey bə dırozmuddətinə cəzo məhkum karde həxədə çəşnavi doe barədə qəp jəşe. Çey 3-minə kərə dəstqir karde səbəb ıştə "Feyzbuk" səhifədə əhali bə "Milli Şura" 7 oktyabr mitinqi dəvət karde votəşe. Məhkəmə fevrali 6-ədə dəvom bəkarde.