Çe Taleh Bağırzadə tojə məhkəmə bino bıə

Yanvarə manqi 26-minə ruji Boku Ğərədağ rayoni məhkəmədə bə Mısılmonon İbemonə Hərəkati sədr, hacı Taleh Bağırzadə əleyh tojə cinayətə koy dair muhakimə bino bıə.

Məhkəmə oj dəvunie elan kardəşone, əmo de muxtəlifə vonə ictimaiyyəti numayəndon və dini fəalon bə məhkəmə iclas vadoəşon ni, əvon polison tərəfo bə hoziə rəftori məruz mandən. Bı səfə bə Taleh Bağırzadə əleyh de Cinayətə Məcəllə zindonədə ğədəğən bıə əşyaon oğəte maddə Ədliyyə Vəzarəti İstintağə İdarə cinayətə ko bino kardəşe.

Bağırzadə bə Ğobustani zindon ovoştıniədə çey səpe 7 qılə fleş karta peydo kardəşonbe, ekspertiza həmonə kartonədə ğeyr-əz Ğıroni təfsiri co çi nıbe barədə rəy doəşbe. "Vətənuğrunda.az" sayt xəbə dodə ki, vəkil  Fariz Namazlı ittihamon beəsas bıe səbəbiku bə ım cinayətə koy xətm doe xahiş kardəşe, əmo hakim Rufan Mursəlovi ım vəsadət təmin kardəş ni.

Hacı Taleh ıştə nitğədə votəşe ki, 2011-minə soriku 5-minə kərəy ki, hokumət ey ittiham kardedə. Əslədə ıvırə muttəhimon tribuna ne, xitabət tribunay, əv bə Xıdo şukur kardedə ki, ıştə fikri bə cəmiyyəti rosnie ro bo eyo jıqo imkan soxtəşe. Taleh həmən votəşe ki, Ğobustani zindonxonən daxil respublika həmə zindononədə məhbuson fleş kart hesteşone və çəvədə bemaneə istifadə kardedən,  tosə ısət bı səbəb hiç kəs ittiham kardəşon ni. İmən subut kardedə ki, bə çey əleyh ım cinayətə ko qıley siyasi sifarişey.

Məhkəmə fevrali 6-ədə dəvom bəkarde.