2 rujədə 8 kəsi bəştə ğəsd kardışe

Boku hokuməti rəsmiyon daima Respublikadə əhali firəfanəti səviyyə pos bıe, kosibəti, beçizəti, bekorəti faiz sari eqınie barədə qəpon jedən. Hətto jıqo proqnoz dodən ki, tosə 2020-minə sori məmləkətədə həni beçizə odəm nibəbe. Yəni jıqo odəmon ki, ısət çəmiyyəti 5%-i təşkil kardedən, 2 sori bədiqə çəvon faiz bə nol ebəqıne.

İqlə bə yanvarə manqi şəhrıvandon intihar karde statistika nəzər səğandeədə məlum bedə ki, hokuməti məqəvuji ıştə sosial siyasəti həniən qıvonin karde nəticədə kosibə odəmon de fiziki cəhəto tuməbır karde roy bəştə məğsəd rəse pidəşe. 2018-minə sori budcədə Prezidenti Adminstrasiya, Milli Məclisi büdcə, Parlamenti deputaton məvacib, hərbi xarcon ziyod, sosial xarcon isə kam kardışone. Hejo çe jıqo beysurə siyasəti nəticəy ki, Ağsu rayoni İlxıçı diədə 36 sınninə 3 qılə hırdəni xıvand Kərimova Səbirə Tehroni kinə maddi ehtiyaci səbəbiku ıştənış ehaşte. Bə ım beçizə xeyzoni tojəsoriku sosial muavinət həni dodənıbin, əvon bərği puli doe imkanədə nıbe səbəbiku, çəvon elektrikşonən bıriəbe. Ağsu rayoni Prokurotura de ım intihari əlağədar cinayətə ko bino kardəşe. "Korrupsiyaş.az" sayt nıvıştedə ki, Əhali Sosial Mudafiə vəzir Səlim Muslumov çe Ağsu rayoni İcra hakimiyyəti sərdar Ənvər Seyidəliyevi hovə zoəy. Çəvon ım kosibə ailə muavinəti bırie bə jıqo intihari səbəb bıə, əvon əqər ıştə vəzifə səlahiyyətşon icra kardəbe ım faciə vağeə nəəbi.

"Azadlıq.info" xəbə dodə ki, yanvari 23-24-minə rujonədə Şəki, Ağsu, Ucar rayononədə 8 nəfəri bəştə ğəsd kardəşe. Çəvonədə 1 kəs Şəki şəhər polis şebədə ko kardə polise.

Təhlilqəron Respublikadə intiharə hadison ziyod be əsasə səbəbi əhali maddi quzərani rujbəruj qıvonin beədə vindedən.