De reqionon inkişafi əlağədar konfrans
Yanvari 29-minə ruji Az.R hokuməti Bokuədə de reqionon inkişafi əlağədar qıley konfrans dəvinişe, Prezident İlham Əliyeviən əyo iştirakış hestbe, nitğşən vote. Rəsmi AZƏRTAC İnformasiya Aqentiyyəti bı barədə xəbə doəşe.
Meydan TV nıvıştedə ki, 2004-2017-minə soron dırozi bo Respublika reqionon inkişafi ro 62 mld. 800 milyon mənot budcəku pul xarc kardəşone. Yəni bı 13 sorədə har sor de miyonə hisobi 5 mld. mənot məsrəf bıə ki, ımən həmonə soron budcə təğribən 25% - i təşkil kardedə. Əmo bə rayonon ımrujnə vəziyyəti nəzər səğandeədə oşko bedə ki, anədə vəsaiton bo çəvon iğtisadi-sosial inkişafi anəhoyən foydəş bıə ni. Çunki ım vəsait əsasən bə ğeyri-istehsal sahon xarc kardəşone. Hejo jıqo siyasəti nəticəy ki, bə 2018-minə sori budcə rayonon avjor kardə verqion məbləğ cəmi 650 milyon mənot, yəni çe budcə 3,23 % nəzərədə qətə bıə. 13 sorədə 62 mld. mənot, yəni təğribən 75 mld. dollar vəsauti bı ğədər effekt nıdoe əsasə səbəb reqiononədə xeyli ğeyri-istehsalə obyekton - H.Əliyevi muzey və parkon, məktəb və mərizxonon dute, həmən ım pulon xeyli hissə korrupsiya nəticədə hokuməti məmuron tərəfo dələmurd kardeye.
Im curə korrupsiya fakton daima Hisobkardə Palata bə oşko bekardedə. Dəvardə rujonədə Maliyyə Vəzarəti ponə sori 10 qılə devlətə təşkilatədə ıştə bardə təftişi nəticə bə cəmiyyəti rosniəşe, 2 milyon 300 həzo mənot məbləşədə korrupsiya fakton bə meydon bekardəşe. Marağinə cəhət ıme ki, anədə xəzinə pulon dızdie fakton miyonədey, əmo ım pulon hardə dızdon barədə cəzo tədbiron həxədə hiç qıley xəbə ni.
