Əliyevi nubəku bə kənoə prezidentə entexabat təyin kardışe

Az.R-ədə nubəninə prezidentə entexabat ım sori oktyabrə manqi 17 -minə ruji dəvardənin bıe. Fevrali 5-ədə İlham Əliyevi sərəncom doşe ki, apreli 11-ədə nubəku bə kənoə prezidentə entexabat dəvuniə bıbo. Mərkəzi Entexabatə Komissiyan çey ım sərəncom təsdiğ kardışe.

Im xəbə bo Respublika cəmiyyəti ənəxəbədə bıe. Çunki, TAP sıxanəvot, MM deputat Səyavuş Novruzovi hələ dekabrə manqədə ım məzmuninə xəbon barədə votəşbe ki, prezidenti nubəku bə kənoə entexabati barədə xəbon təxribate, ın xəbə pesoxtəkəsonən təxribatkaronin.

Isət məlim badə ki, bə vaxti bə Entexabatə Məcəllə ki, əlavə və əvəzon kardışone, ımon Prezidentə Entexabati çe ıştə vaxtiku bə nav okırnie xidmət kardedəybən, bımi qorə bə meydon omə xəbonən bənə Novruzovi votəynə təxribat ne, həğiğətebən.

Respublika əsasə muxalifə ğıvvə - "Milli Şura" həmonə ruji  iclas dəvuniəşe, prezidenti ım sərəncom hənəkbazi və məzhəkə hisob kardəşe, ım entexabati boykot karde ğəror doəşe. "Musavat" partiya ki, həftəyi bə nav İsa Ğənbərış bə prezidentəti bənə namizədi bə nav doəbe, elan kardışe ki, de ım sərəncami əlağədar ıştə iclasi dəbəvunie və bə ğəror bome. Siyasətmədaron jıqo proqnoz dodən ki, hokumət de "Musavat"i rəhbəriyyəti roziəti bə dast bəvarde ki, əvon ım entexabati boykot nıkon, demiən çey leqetimiyyəti bə şübhə ji dənığandon.

Boku AZƏRTAC İnformasiya Aqentiyyəti Prezidenti koməkkar Əli Həsənovi şərh pevolo kardəşe. Həsənovi votəşe ki, prezidentə entexabati 7 manq bə nav varde bə səbəb zəruri bıe ki, ımsori 2-minə hissədə Respublikadə xeyli Beynəlxalğə və de Azərbaycanə Xalğə Cumhuriyyəti 100 sornə qardışi əlağədar tədbiron dəvunie nəzərədə qətə bedə. Həmən məmləkətədə vıjniəyon həmişə pozə fəsilədə dəvuniə bedəbe. Isət əvoni co-co semonoədə dəvunie bə məğsədi muvafiğe.