Hokuməti pensiyon çanədə ziyod kardışe

Fevrali 9-ədə prezident İlham Əliyevi pensiyon indeksasiya karde barədə sərəncom doşe. Bi sərəncomədə bə Sosial Mudafiə Vəzarəti dəstur doə bedə ki, pension 2017-minə sori məmləkətədə miyonə manqə məvacibi faiz nisbətədə perosi ğədər ziyod bıko.

Im vəzarəti nazir Səlim Muslumoviən demi əlağədar mətbuatə konfransədə votəşe ki, Devlətə Statistika Komitə rəsmən elan kardəşe ki, dəvardə sori miyonə manqə məvacib 5,7 % ziyod bıə. Imsor pensiyon məbləğiən anədə ziyod bəkarden. Məsələn, 200 mənot pensiya səkəson 211 mənot 40 kopik bəsen.

Imiən ğeyd karde zərurie ki, tosə ısət pensiya və məvacibon  har sor keşvəri iğtisadiyyatədə infilyasiya faiz miğdari ğədərədə indeksasiya kardə bedəbe. Ponə sori Respublikadə hokuməti infilyasiya 13% səviyyədə bıe etiraf kardəşbe. Bə muvafiğ ğanuni əsasən pensiya və məvacibonən bəpe ım ğədər ziyod bəbey. Səlim Muslumovi votəşe ki, çimi bəpeştə indeksasiya bə miyonə manqə məvacibi ziyod bıə faizi əsasən icra kardə bəbe.

Sər Nazir Artur Rasizadən sərəncom doəşe ki, devlətə təşkilati ğeyri-ixtisasinə koəkon - xadimə, boğəvon, ğərəvulçi və diğər həmkaron manğə məvacib 4% ziyod kardə bıbo. Yəni, məsələn, manqi 130 mənot məvacib sə koəkə çimi bəpeşt 135 mənot 20 kopik  bəse.

"Azadlıq.info" çe Devlətə Statistika Komitə jıqo qıley məlumat pevolo kardəşe ki, tojə sori yanvarə manqədə bə dəvardə sori dekabri nisbətən ərzaği ğıymət 0,5%, ğeyri-ərzağə molon ğiymət isə 0,2% boho bıə.