Bokuədə dini məhbuson muhakimə dəvom kardedə

Boku hokuməti bə dini fəalon repressiya siyasəti dəvom hestışe. Fevrali 13-minə ruji paytaxti 3 qılə məhkəmə iclasonədə cəvon muhakimə dəvuniəşone.

Boku Qonə Cinayəton məhkəmədə bə Əhsən Nuruzadə muhakimə edamə doəşone. Vəkil Fariz Namazlı şahid Adil Əhmədovi tosə ısət 12 qılə məhkəmədə şoydiəti karde, diqər şoyd Namət İbrahimovi de alkoqolizm və psixi nırəsəy diaqnozi 2014-minə soriku mualicə dispanserdə ğeydiyyatədə bıe, 3-minə şoyd Anar Şəfiyev isə "Bandotdeli" həmkar, yəni çe ittiham tərəfi odəm  bıe səbəbiku çəvon doə ifadə çe istintaği materialonku bekarde xahiş kardəşe, əmo hakimi çey ım vəsadəton təmin kardəş ni. Məhkəmə fevrali 20-ədə dəvom bəkarde.

Həmonə ruji Boku Ali Məhkəmədə nomojə məhbus Azərbaycani Ruhanion Məclisi üzv bə Şeyx Sərdar Hacıhəsənli kassasiya şikayəti diə kardəşone. Im məhkəmən vəkili bə nav doə vəsadəton hiç qıley təmin kardəş ni, navonə məhkəmə ğərar təsdığ kardəşe. Vəkil Cavad Cavadovi bə "Maide.az" sayti votəşe ki, Ali Məhkəmə ım ğərariku bə Avropa Bəşəri Huğuğon Məhkəmə şikayət bəvğande.

İjən həmonə ruji Boku Ğərədağ rayoni məhkəmədə Taleh Bağırzadə həxədə hokum elan bıə.  Çey vəkili  fleş-karti radioelektron cihaz hisob kardə eksperti bənə şohidi bə məhkəmə dəvət, çey doə ekspertə rəyi barədə bə Konstitusiya Məhkəmə muraciət karde barədə vəsadəton hakimi təmin kardənişe, və bo Bağırzadə 5 manq zindonə cəzo bıriəşe, bə cey navonə 20 sorinə məhkumiyyət muddəti əlavə kardəşe.