Hokuməti di təsərrufati bəzi sahon inkişafi dair dırozmuddətinə planon

Dəvardə həftədə prezident Əliyevi məmləkətədə 2018-2025-minə soron dırozi şartukəvonəti, çayəvonəti və sitrusə mivəvonəti sahon inkişaf kardovnie barədə 3 qılə sərəncom doşe. Im sənədonədə nəzərədə qətə bedə ki, tosə 2025-minə sori çayə livə istehsal bə 8 həzo 500 ton, sitrusə mivon istehsal bə 100 həzo ton rəsənine.

Əmo mutəxəssison bə ım plani bədbin diə kardedən. Di təsərrufati ekspert Vahid Məhərrəmovi bə "Turan" İnformasiya Aqentiyyəti votəşe ki, İ.Əliyevi bə pambəvonəti de inzibati roy inkişaf do təşəbbus bə ekstensiv inkişafi, həmən bı koy xeyli devlətə pulon xarci səbəb bıe. 1992-minə sori məmləkəti fermeron 336 həzo ton pambə istehsal kardəşonbe, məhsuldarətiən har hektarədə 18 centner bıe. Devləti bə ım sahə hiç 1 mənotən xarc kardəş nıbe, əmo bə məmləkət 100 milyon dollar valyuta daxil bıəbe. Əliyevi pambəvonəti inkişaf kardə proqrami nəticədə dəvardə sori devləti bı sahə cand milyon mənot subsidiya məsrəf kardışe, əmo 207 həzo ton pambə qırd kardışone, məhsuldarətiən cəmi 15 centner bıe.

Məhərrəmovi həmən ğeyd kardəşe ki, 2002-minə soriku jıqoşə, yəni İlham Əliyevi hakimiyyəti devrədə devlət ıştə əhali de ərzaği təchizatədə çe xariciku bə jidasti vəziyyət eqıniə.  Bə məmləkət qandımi idxal 2,4 kərə, məkə idxal 86 kərə, şəkəri idxal 2,8, mivə 13,6, tərəvəz 4,3, kartof 5,6, çayi idxal 3 kərə, beməyə ruən 5 kərə, şıt məhsulon 2 kərə, moğnə 6,8 kərə, qujdi idxal isə 10 kərə ziyod bıə.

Mutəxəssison jıqo tənəzzuli səbəbi məmuron rışvəxorəti, fermeron muflis kardə siyasət barde, çəvon zəminon oliqarxon tərəfo zəbt kardeyədə vindedən.