Az. R -ədə əhali de miyonə hisobi çand sor jidə
Dınyo har qıley mədəni devlət məmləkətədə pensiya yaşi təyin karde ro ıştə şəhrvandon miyonə umri çand sor be müəyyən kardedə. İnkişaf kardə məmləkətonədə pensiya yaşi de miyonə umri arədə 10 -12 sor fərğ müəyyən kardəşone.
Az.R hokumətən pensiya yaşi ros karde ro ıştə şəhrvandon de miyonə hisobi quya 73 sor jımon karde votedə. İlham Əliyevi ım sor aprelə manqədə votışe ki, çand sore məmləkətədə əhali dispanserizasiya bardedən, məlum bə ki, camaati 91% tam sağlame. Azərbaycan devləti elan kardə bənə co statistik rəğəmon, ım rəğəmiən real vəziyyətiku çanədə diəro be oşko vində bedə. Har sor bə Rusiya, Türkiyə, Qurcistani votedənimon, i qılə bə İron 200 həzo şəhrıvandi bo müalicə şə məmlkəti 9 milyonə əhali 91% çı cürə sağlam be bəzıne.
Bı rujonədə Səhiyyə Vəzarəti elan kardışe ki, 2015-minə sori iyuniku tosə 2016-minə sori noyabri müayinədə dəvardə odəmonədə 9892 nəfər talassemiya, 828 nəfər sifilis, 147 nəfər SPİD-ə noxəşin oşko bıə. Ğeyr-əz ımon məmləkətədə 40 həzo onkoloqiya, 200 həzo diabet, 12 həzo silə (vərəm) noxəşin heste.
"Azadlıq.info" məlumat dodə ki, orəxnə 25 sorədə Az.R -ədə tosə 65 həzo korpə mardə. İmən har sor de miyonə hisobi 2500 nəfərisən vey təşkil kardedə. 2015 -minə sori korpə mardəy miğdar 2033 nəfər bıə. Bə məmləkətədə ki, har sor 2033 nəfər korpə tələf bedəbu, jəqo bəpe çand kəs tosə 100 sınni umr bıko ki, əyo əhali miyonə umr 73 sor bıbo?
