Dini məhbuson mudafiə komitə mətbuatə konfrans dəvuniəşe
Azərbaycani Ruşinəfikron İbemoni Boku ofisədə "Dini məhbuson mudafiə komitə" de "Siyasi məhbusə ailon koordinasiya mərkəzi" bahəm mətbuatə konfrans dəvuniəşe.
Tədbirədə nafkonə siyasi və dini məhbuson, ictimai siyasi fəalon, məhbuson ailə uzvon iştirak kardəşone. Natiğon bə məhbuson, həmən bə çəvon ailə uzvon mevcud təzyiğonku qəp jəşone, bəvon hartərəfinə komək karde zəruriyyət ğeyd kardışone. Məlumat doşəone ki, məhkəmədə siyasi və dini məhbuson orəxnə sıxanono ibarət kitobi bə çap hozo kardedən.
Boku Apellyasiya Məhkəmə bə Mısılmonon İbemonə Hərəkati fəal Samir Babayevi şikayəti diə kardəşe. Babayev fevrali -3 minə ruji polisi tərəfo dəstqir bıə, məhkəmə bo əy 60 sutkə zindonə cəzo bıriəşe. Ponə sori oktyabri 7-ədən əv bə 30 sutkə muddəti bə zindon dənoəşonbe. Samir Babayev ıştə dəstqir karde səbəbi Taleh Bağırzadə tərəfdar bıedə vindedə. Əmo Apeiiyasiya məhkəmə çey şikayət təmin kardəşni, Sabunçi rayon məhkəmə hukm ğuvvədə oqətəşe.
Ğəfğaz Mısılmonon İdarədə ım sornə bə həcc ziyarət şəkəsonku sənədon ğəbul bino bıə. Im İdarə rəsmi Həmdulla Babayevi bo Az.R zəvvaron 600 nəfər kvota muəyyən bıe şaiyon təkzib kardəşe, bə "Report" sayti votəşe ki, ımsor bo Azərbaycani 1200 kvota co kardəşone, əqər muraciəton miğdar vey bıbo, ey bə 2000 nəfər ros karde mukun bəbe. Isətnə həcc ziyarəti ğıymət 4150 dollare.
"Vətən uğrunda" saytən Az.R-ku bə Həcc şə zəvvaron miğdari sorbəsor kam bıeku xəbə dodə. Çiyo 2015-minə sori 2400 nəfər, 2016-minə sori 1040, dəvardə sori isə 900 zəvvar bə Həcc şəbe.
