Bə Bayıli kə rıjiə sakinon kirayə pul bədon

Boku şəhəri Bayıl məntəğə saruyə zəmini luə doe nəticədə 4 qılə kə rıjiə, 98 ailə mənzilonən de rıjie xəto vəbəvən. De ım vəziyyəti əlağədar Naziron Kabineti sərəncom doəşe ki, ım mənzilon xıvandon bə kirayə mənzilon kuçovnie ro bəvon 11 manqi muddətədə kirayə pulon doə bıbo.

"Maide.az" sayt bə "Yeni Musavati" istinadən xəbə dodə ki, çe ım kəon sakinon hokuməti bə çəvon vəziyyəti biqonə mandeku norozin. Tosə ısət bəvon nəinki hiç qıley kirayə pul doəşon ni, hətto həmonə puli miğdariən bəvon votedənin. Şaiyə heste ki, bəvon har manq təğribən 250 mənot kirayə pul bıdon. Hərçənd ki Bayılədə bə ım ğıymət kə bə kirayə qəte mumkun ni. Hokuməti məmuron tosə ısət  ğəzo zonadə mandə kəon sahə pamuəşon ni. Çəvon rıjie təğdirədə bə kəxıvandon çanədə kompensasiya doe məsələn bə mışğıl ebəqınie. Səbayil rayoni İcra Hakimiyyəti tosə ısət bo ım kəon sənəd tərtib kardəşni, əvoni ğeyri-ğanuni hisob kardedə. Bəhalinən be çəvon icazə rayoni əraziədə sıği çe sıği səpe noe mumkun ni.

"A24.az" saytən ım rayoni icra sərdar Eldar Əzizovi sıxanon bə əhandon təğdim kardedə. Ey votəşe ki, tosə ısət 67 qılə ailə ıştə sənədon təğdim kardəşone, əvon har manq 260 mənot kirayə puli fevrali 20-ku se bəzınen. Əmandənə kəon barədə mutəxəssison əvoni nəzəro dəvuniə bəpeşt ğərar bədon. Əvon həmən kirayə puli çand manq muddətədə doe barədən ıştə fikiri bəvoten.