Dınyoədə Həzrəte Zəhra (s.ə) şəhadəti ruj de matəmi ğeyd kardışone

De hicri-ğəməri təğvimi Cəmadiul Sani manqi 3, de miladi fevrali 20-minə ruj çe Xanım Fatiməye Zəhra (s.ə.) şəhadəti ruje. De ım matəmə ruji munasibəti dınyo muxtəlif məntəğonədə Əhli-Beyt (ə) tərəfdaron əzadarə məclison dəvuniəşone.

"Maide.az" sayt xəbə dodə ki, İron, İrağ, Suriya, Turkiyə, Pakistanədə izdihaminə şemonon təşkil bıə. İrağədə bı matəmə ruji ərəfədə çe dınyo çanədə məntəğonku zəvvaron bə Nəcəf və Kərbəlo omən, İmom Əli (ə), İmom Huseyn (ə) ocəğon ziyarət karde roy, bəvon ıştə həmdardi izhar kardəşone.

Dindaron jıqo əzadarə məclison çe Avropa Almaniya, Rusiya, Qurcistan və həniən çand qılə məmləkətonədən təşkil kardəşone. "Qurcistani Əhli-Beyt cəmiyyət" və "Zeynəb Zənənon İbemon" təşkilaton bahəm qıley izdihaminə əza mərasim dəvuniəşone, ehsan doəşone. De Əyyami - Fatimiyyə rujon munasibəti ım cəmiyyəton Qurcistani 10 qılə məntəğədən jıqo əza məclisonşon dəvuniə.

"İslamazeri.com" sayt Boku həmə məçitonədə "Əyyami Fatimə" əza məclison dəvarde həxədə xəbə doəşe. "Xanım Fatiməyi Zəhra" məçitədə İlahiyyatçi Ramil Bədəlovi votemon kardəşe, de Həzrəti Fatimə (s.ə) şəhadəti əlağədar məğamon həxədə qəp jəşe, nohə votəşe, Əhlibeyti məddah Hacı Hikmət Bağırovi mərsiyyə və rozə handəşe, de ım ğəmi munasibəti bə məclis əhli təsliyyət ərz kardəşe. Jıqo məclison Boku şəhəri "Məşədi Dadaş", Bulbulə ğəsəbə "İmom Ummət" və həniən co məçitonədən de veymiğdarinə əzadaron iştiraki dəvuniə bıə.