Əhsən Nuruzadə məhkəmə istintağ bə orəx rəsə

Fevrali 20-minə ruji Boku Qonə Cinayəton Məhkəmədə dini fəal Əhsən Nuruzadə muhakimə dəvom kardəşe. "Vətən uğrunda.az" sayt nıvıştedə ki, Əhsən Nuruzadə məhkəmə iclasədə votəşe ki, "istintaği vaxti müstəntiğ mıku xəbə sedəbe ki, boçi ko kardedəniş? Az bey voteədə ki, ko ni, əv bəmı votedəbe - bışi sığ bıkırın.

Az ali təhsilinə mutəxəssisim, boçi bəpe sığ bıkırnım?" Vəkil Fariz Namazlı vəsadət bə nav doəşe ki, Nuruzadə dəstqir kardəkəson de dini ekstremizmi mubarizə şebə həmkarin. Əvon çoko bedə ki, de narkotiki əlağədar əməliyyatədə iştirak kardəşone? Əmo hakim Səbuhi Huseynovi çey ım, həmən co vəsadəton rədd kardəşe. Demiən məhkəmədə istintağə proses bə orəx rəsə. Fevrali 27-ədə prokuror ıştə cəzo nitği ehandənine.

Həmonə ruji Nardarani faciə orəxnə 2 nəfər məhbus - Əbulfəz Bunyadov və Elxan İskəndərovi muhakimən dəvom kardəşe. Məhkəmədə Bunyadovi səhhət xərob bıə, doktoron bey tibbi komək nişon doəşone. Əv bə hakimi parson cəvob doe holədə bıə ni. Bə jıqo vəziyyəti etirazədə hakimi votəşe ki,  tibbi ekspertiza Bunyadovi məhkəmədə iştirak karde mumkunati barədə musbət rəy doəşe. Elxan İskəndərovi isə istintaği bey elan kardə ittiham rədd kardəşe, ıştə təmomən be qıno bıe votəşe.

Məhkəmə peşonə iclas fevrali 23-ədə dəbəvarde.