Minqəçevir şəhəri sakinon qıvoninə quzəran

Minqəçevirədə prezident İlham Əliyevi ome ro hozoəti tədbiron vindedən. Ə roon ki, çey kortej dəvardənine, təmir kardəşone, tojə asfalt dəvoştəşone, dəbastə vəziyyətədə oğətedən, bə ictimai nəğliyyati dey hərəkəti icazə dodənin.

Bə şəhəri binaon tojə dimə kəşəşone, parkon təmiz kardəşone, şəhər icra hakimiyyəti məmuron iaşə obykton və məğəzenon nəvedən, bə çəvon xıvandon çəşnavi dodən ki, prezidenti omə ruji obyekton dəbaston, ıştə kəonku bə kəno benışon.

Şəhəri sakin Hidayət Əskərovi bə Meydan TV votəşe ki, xalqi bə prezidenti vote ro xeyli sıxanon hestışe. Şəhəri ən yolə problem bekorətie. Çanədə odəm bekorəti səbəbiku har ruj de muxtəlifə problemon vəbəvə mandedə. Iştə ailə quzərani təmin karde mumkun nıbe bə intiharon, dızdiə əməlon, xeyzonon vılo bıe, hırdənon be xıvand mande səbəb bedə. Im problemon həxədə qəp jeədə, ıştə həxi tələb kardeədə votedən ki, bə devləti əleyh təbliğat bardedəş.

Diqər sakin Sədaqət Mirzəyevan votəşe ki, Soveti vaxti Minqəçevir sənaye şəhər bıe. İsət iyo ğeyr-əz Ovə və Qamə Elektrikə Stansiyon hiç qıley sənaye muəssisə ni. Hırdə ticari muəssison fəaliyyətədən ki, əvonən əksərən bə şəhəri məmuron və çəvon nezə odəmon mənsubin. Bə peşomə ovi tələbat tosə ısət həll kardə bıə ni. Bımi ro prezidenti tərəfo çand kərə de milyonon pul co kardə bıə, əmo ım məsələ bə mışğıl eqıniə.

Minqəçeviri İcra Hakimiyyətiku bə muxbiri parsi cəvobədə votəşone ki, şəhərədə bekorə odəmon miğdar rujbəruj kam bedə, bərğ, ğaz, ovi problem tam həll bıə. 2018-minə sori məktəb və əğılə bağçon bınope təmir, əhali jimon kardə umumiə binaon kumi əvəz, demiən Minqəçevir şəhəri problemon tam həll bəkardemon.