Bokuədə İroni Kino Həftə bino bıə

Bokuədə Az.R Mədəniyyət və Turizm Vəzarəti de İİR Az.R-ədə Səfarəti bahəm təşkil kardə İroni Kino Həftə ojbemonə mərasim dəvardə. "Report.az" sayt xəbə dodə ki, bı tədbirədə Az.R mədəniyyəti vəzir Əbulfəs Ğarayev, İİR Mədəni və İslami əlağon Təşkilati sədr Əbuzər İbrahimi Turkaman və diqər ictimai xadimon iştirak kardəşone.

Ğarayevi votəşe ki, "Azərbaycan və İroni arədə jıqo mədəni tədbiron har sor təşkil bəkardemon. Bovəm heste ki,  çəmə təmoşəqəron bə İroni kino sənəti numunon de həvəsi təmoşo bəkarden".

Əbuzər İbrahimiən ğeyd kardəşe ki, "çəmə ım dı qılə keşvəri arədə mədəni əlağon inkişaf kardovnie vey ehtiyac heste. Muştərək qıley film kəşe barədə bə  ğəror oməmon . Dəvardə sori İronədə Az.R mədəniyyətə rujon dəvuniəmon bıe. İronədə Azərbaycani filmon numayişi təşkil karde fikirmonən heste".

Mərasimi orəxədə rejissor İbrahim Hatimikyani "Pasivon" film numayiş kardəşone.

İm tədbiri çərçivədə tosə fevrali 27-i Boku Nizami Kino Mərkəzədə çe Kəmal Təbrizi "Xəyali şinə təm", çe Əbdulhəsən Davudi "Divonə top", Kiyamərs Purəhmədi "Məşom kıve?" filmon numayiş bəkarden.

Dı qılə məmləkəton arədə iğtisadi əlağon inkişaf kardovnie planonən hestin. İroni sənaye və ticarəti vəzir Məhəmməd Şəriətmədari bə "Trend" sayti votəşe ki, "nezə vaxtonədə  Azərbaycanədə avtomobil istehsal kardə muştərəkə muəsisə obənine".

İmsori iminə çətvərədə Natəçolədə "İronXodro" və "Azerikar" şirkəton muştərək muəsisə ıştə koy bino kardənine. İm xəbə Meydan TV doəşe.