Azərbaycan Respublikaədə be icozə nımoj vote ğədəğən elan be.
De cəzo ğanuni maddon əvəz karde ısət Azərbaycan Respublikaədə kişvəriku xaric dini məktəbonədə dərs handə ruhanion be icozə nımoj vote ya xot dini mərasimon dəvoniye həxışon ni ijən i sor həbs ğanuni rioyət nıkardə kəsonro nəzər qətə bəy.
Bə Riport internetiyə mərkəzi raporti əsos çı dini eteğadon ozodəti nomo bıə ğanuni əvəz karde nəticəku xaricədə dərs handə ruhanion bəbe ıştə harcurnə fəaliyətonro icozəşon bıbu ijən ğanuni arşiyə kəson həbs cəzo bə kəno cərimə həm bəbe bıdən.
Im ğərol çı Azərbaycan Respublika milli məclesi martə manqi 6 nə rujədə rəsmi sohbət təsdiğ bəbe.
Ğəfğaz mısılmonə ruhanion idarə de dini qrupon fəaliyəton dıvlətiyə kamissiya rizoyət bə xarıci dini eksperton iyən xaricədə dərs hande ruhanion fəaliyətiro icozəon sadir bəkay.
Jıqonə ğanuni barədə tojədən sohbəton krde qıləy şərayetdə bəyon bıdə ki çımiku bə nav və de Masalli icra hakimi rəsmi şikayət ım şəhri cumə nımoji imom hoci Sərdar Həsənəlişon cumə nımoji dəvoniyə xoto dəstqir kardə bıən əv həm bə çəy xoto ki əv İronədə dərsış handə və Masalliədə cumə nımoji dəvoniyəş be.
Vey dini fəalon İslam Partiya ozvon, hətto Azərbaycan Respublika dini və etığadi məhboson mudafiə əkə mərkəz iyən Russiyə ruhanion bə ım fəalə islam çəy dəstqir karde etıroz kardə bıən.
