Prezidenti sosial muavinəton ziyod kardışe

Prezident İlham Əliyevi prezidentə entexabaton ərəfədə əhali sosial muavinəton ziyod karde barədə çand qılə sərəncam doəşe.

Azadi radio xəbə dodə ki, bə 5 nəfərisən vey fərzəndış bıə xeyzonon, bə muharibə əlilon, şəhidə ailon, məcburi pənahəndon və korpə əğılinə moon manqə muavinət 10 % ziyod kardışe. Məsələn, tosə ısət veyfərzəndinə ailon manqə muavinət bə har hırdəni 30 mənot bıe, ısət əv 33 mənot bəbe. Korpədarə moon, korpə tosə 1 sınni 40 mənot, tosə 3 sınni 25 mənot sedəbe, jıqoşə 44 mənot və 27 mənot 50 kopik bəse.

Prezidenti fərdi təğaudon, fəxri nomdarə odəmon muavinətonən ziyod kardışe. Prezidentə təğaudi məbləğ 1300 mənotiku bə 1450 mənot, yəni təğribən 12%, "milli ğəhrəman nom sə odəmon təğaud 1300-ku bə 1500 mənot, yəni 15%, istedadinə cıvonon stipendiya 300 mənotiku bə 400 mənot (33 %), "xalq" nominə sənətkoron təğaud 50%, "əməkdar" nominə sənətkoron təğaud isə 67 % ziyod bəbe.

İlham Əliyevi çimi bə nav pension de infilyasiya faizi ne, de miyonə manqə məvacibi ziyod bıe faizi vey karde, ısətən kosibə zumrə muavinəton de kamə nisbəti, diqər təbəğon muavinəton de veyə nisbəti ziyod karde, cəmiyyətədə təbəğon arədə fərği həniən nığıl bəkarde. Hərcənd ki, Az.R hokuməti çe Avropa İttifaği vədə təəhhudış heste ki, ıştə şəhrıvandon minimum məvacibon və pension tədricən bə miyonə manqə məvacibi 60%-i rosniə sosial siyasət bəbarde. Əliyevi ım sərəncamon çey sosial siyasəti bımi tam əks istiğamətədə barde nişon dodə.

Əlavən vote lozime ki, Az.R-ədə bə tojə moəo bıə korpə ikərəninə koməki məbləğ 90 mənot, yəni 52 dollar, Ermənistanədə isə ım curə komək 135 dollare. Çəvrey hokumət tosə 18 sınni bə hırdənon har manq 95 dollar muavinət dodə, Əliyevi hokumət isə 5-minə əğıli bəpeştə tosə 3 sınni 15 dollar dodə.