Nardarani faciə məhbus Əbulfəz Bunyadovi məhkəmədə ifadə doəşe
Boku Qonə Cinayəton Məhkəmədə Nardarani faciə orəxnə 2 nəfər məhbuson - Əbulfəz Bunyadov və Elxan İskəndərovi muhakimə dəvom kardəşe.
Polison həmlə kardə kəy xıvand Əbulfəz Bunyadovi ki, ey de qolulə je nəticədə iflic bıə, hərəkət karde zınedəni, bə məhkəmə de tibbi həmkaron nəzarəti xəki səpe vardedən, həmonə hadison barədə ifadə doəşe, votəşe ki, nomoji vaxti polison bəvon silahinə həmlə kardışone, həlok bıə polisonən daxil 6 nəfər kıştışone. Ekspertiza rəy doəşe ki, quya polison qumbara tıpəy nəticədə mardən. Im due. Çunki əqər jıqo bıəbe, bəvədə soədə ım tıpemoni rizon əmandin. Həmonə əməliyyati de çand qılə kamera kəşedəbin. Isət boçi məhkəmədə həmonə kadron nişon dodənin? Çunki ittiham tərəfi votəyon həmə du və bıhtono ibarəte.Əqər ə videokəşemonon bə dim bekon, çəvon vəhşiə hərəkəton, çəmə isə tamam beqıno bıe oşko bəbe.
Fevrali 27-minə ruji çe Taleh Bağırzadə həmməslək Əhsən Nuruzadə məhkəmən dəvomış bıə. Ey de narkotikə tiçarəti məşğul be maddə ittiham kardedən. Prokurori Nuruzadə bə 10 sorinə zindonə cəzo məhkum karde tələb bə nav doəşe.
"Azadlıq.info" sayt , Respublika Ali Məhkəmədə Taleh Bağırzadə və cey 17 nəfər həmməsləkon kassasiya şikayəti tədğiğati bino beku xəbə doəşe. Muttəhimonədə 3 nəfər - Abbas Huseynov, Abbas Ğuliyev və Şamil Abdullayevi ım məhkəmədə iştirak karde barədə ərizə nıvıştəşe, çəvon vəkilonən bı barədə vəsadət bə nav doəşone. Hakim Şahin Yusifovi prokurori bımi etiraz karde bə nəzər sə nişe, bə vəkilon vəsadəton muvafiğ həmonə 3 nəfəri nubətinə məhkəmə iclasədə iştirak təmin kardəşe.
