Məmləkətədə dıjdəmiğyasinə əfv sərəncom çəş kardə bedə

Milli Məclisi spiker Oğtay Əsədovi votəşe ki, vəomə manqondə dıjdəmiğyasinə əfv sərəncom çəş kardə bedə. De ım xəbə əlağədar "İslamazeri.com" sayt dini məhbuson azad bıe imkani həxədə ıştə təhlili məğalədə nıvıştedə ki, dəvardə soronədə bəzi dini məhbusonən əfv kardəşonbe. 1999 və 2002-minə soron əfv sərəncamonədə AİP sıftənə sədr azad kardəşonbe. De 2012-minə sori sərəncami 6 nəfər dini xadim və fəal çe zindono beşin.

İsətnə rujonədə Respublika Əfv Komissiya ıclason dəvardedə, bə əfv təğdim bəninə məhbuson siyahi tərtib kardedən ki, bə Prezidenti təğdim bıkon. Çəş kardə bedə ki, Nəvuzə idi və ya Heydər Əliyevi təvəlludə ruji, yəni mayə manqi 10-minə ruji ərəfədə əfv bıə məhbuson nomom elan bıkon. İm sayt həmən ısət Az.R zindononədə cəzo kəşə 102 nəfər dini məhbuson siyahi dərc kardəşe.

Çand ruj bə nav sıxan hestbe ki, çe Taleh Bağırzadə nomi bə əfv siyahi daxil bəkarden . Əmo ey bımi ıştə etiraz bəyon kardışe, diqər dini məhbuson azad nıbə, ey əvf karde nohəxə ko zıneşe.

Ponə sori fevralə manqədə İ. Əliyevi cəzo sistemi humanist karde barədə fərmon doşe. MM Huğuğə siyasəti komitə sədr Əli Huseynli Parlamenti plenar iclasədə ım fərmani icra vəziyyəti barədə məlumat doəşe, votəşe ki, tosə ısət 585 nəfər məhbusi cəzo muddət kam , 479 nəfər azad , 465 nəfəri cəzo ləğv kardə bıə. Həniən 5 həzo nəfər məhbusi barədə jıqo humanistə tədbiron nəzərədə qətə bedə.

Əmo ımən məlume ki, prezidenti humanistə fərmani  əsasən bə dələdızdon aid kardedən. Məhkəmon bə dini və siyasi məhbuson dair humanistə qəror doe barədə hələ ki, jıqo fakt bə içtimaiyyəti məlum ni.