Dini fəal Əhsən Nuruzadə bə 7 sorinə zindonə cəzo məhkum kardışone

Boku Qonə cinayəton məhkəmə "Mısılmonon İbemonə Hərəkati" fəal Əhsən Nuruzadə bə 7 sorinə zindonə cəzo məhkum kardışe, əv narkotikə ticarətədə qınokar zıneşe. Nuruzadə və çey vəkil Fariz Namazlı ım ittiham beəsos hisob kardışone.

Bımi ro xeyli dəlil və subuton bə nav doşone. Nuruzadə 2017-minə sori 19 yanvar və 24 sentyabr tarixonədə Nardarani faciə məhbuson məhkəmə prosesonədə iştirak karde səbəbiku de co şər ittihamon bə inzibati cəzo məhkum bıəbe. De nəşə ticarəti məşğul bıəkəsi de siyasi fəaliyyəti məşğul bıe, bə polison dəsturi quş nıdoe absurd qıley koe.

 Nuruzadən ıştə orəxnə sıxanədə votəşe ki, "bə məhkum bıə dindaron ailon koməkəti ro ianə qırd kardedəbimon. Ə ailonədə jiqo hırdənon hestin ki, bə məktəb şe ro olət nişone, vaxtədə bo harde ro nun peydo karde zınedənin. "Bandotdel"ədə mıku xəbə sedəbin ki, bə əmə ki maliyyə dodə? Bə cəmə ianə qırd karde bovə kardedənıbin. Kurdəxonə zindonxonədə har məhbusi kart hestışe. Çımı kartədə "Nardaran" kəlimə nıvıştəşone. Yəni mınşon de Nardarani koy əlağədar qətə. Əqər mınyon de narkotika ticarəti əlağədar dəstqir kardəyonebu, bəs bə Nardarani nomi boci anqıl kardedəyon. 

Əmo hakim Səbuhi Huseynovi sədrəti kardə məhkəmə kolleqiya ım dəlilon bə nəzər sə nişe, bo Nuruzadə 7 sor muddətinə zindonə cəzo bıriəşe.