Dınyo mısılmonon Xanım Həzrəte Fatimə Zəhra(s) mevludi ruj ğeyd kardışone

De Hicri Ğəməri təğvimi Cəmadiul-sani manqi 20, de miladi təğvimi marti 9-minə ruj Peyğəmbər (s.ə.v.s) kinə, şiə imomon moə Həzrəte Fatimə Zəhra (s.ə) təvəlludə ruje. Bənə har sori ımsorən dınyo mısılmonon ım ruj de təntənə ğeyd kardışone. İslami aləmədə ım mubarəkə məğam həmən bənə Xanımon ruji ğeyd kardə bedə.

AİP Zənənon Şura de "İslamın sesi" sayti bahəm bə ım idə ruji xoto qıley tədbir dəvuniəşone, bə xanımon vılə çanqə, bə Həzrəte Fatimə Zəhra (s.ə) jimoni dair bukleton baxş kardəşone.

Boku Bulbulə ğəsəbə "İmom Ummət" məçitədən bə ım mubarəkə ruji dair tədbiron dəvuniəşone. "İslamazeri.com" sayt xəbə dodə ki, İlahiyyatçi Hacı Mirmehdi Dərafərin ıştə votemonədə Əhli-beyt (ə) , məxsusən Həzrəti Zəhra (s.ə.) məğamon həxədə hədison qəp jəşe. Əhlibeyti şair Seyid Nurəddin, məddah Hacı Rasim Xudayi şer, ğəzəl, ilahion votəşone.

Boku Sahil ğəsəbə mominon təşkil kardə məclisədə hırdənon bə ım mubarəkə idi həsr bıə şeron votəşone, viktorina dəvuniə bıə, bə ğalibon hədiyyə, bə kinon hicab təğdim kardəşone.

Umum Qurcistan Mısılmonon Ali Dini İdarə və İmom Əli (ə) Xeyriyyə fondi bəico bı mubarəkə rujonədə silsilə tədbiron dəvuniəşone. "Numunəvi ailə" mevzuədə seminar,  Marneuliədə "vılə aksiya" təşkil kardəşone, bə şəhəri cəmiyyəti numayəndon vıl hədiyyə doəşone. Rustavi şəhəri mısılmonə cəmiyyətiən ım idə rij de əzəməti ğeyd kardəşe.